وزیر اعلیٰ بلوچستان میر عبد القدوس بزنجو نے کہا ہے کہ عوام برف باری کے علاقوں کی جانب سفر سے پہلے حکومتی ہدایات کو ضرور دیکھیں۔

میر عبدالقدوس بزنجو نے مری میں سردی کے باعث سیاحت کے لئے آئے افراد کے جاں بحق ہونے پر دکھ کا اظہار کیا، ان کا کہنا تھا کہ سیاحوں کے جاں بحق ہونے کا واقعہ انتہائی افسوسناک ہے۔

وزیر اعلیٰ بلوچستان نے جاں بحق افراد کے لواحقین سے ہمدردی اور تعزیت کا اظہار کیا، ان کا کہنا تھا کہ عوام برف باری کے علاقوں کی جانب سفر سے پہلے حکومتی ہدایات کو ضرور دیکھیں، غیر ضروری سفر سے گریز کرنے سے ایسے حادثات سے بچا جا سکتا ہے۔

وزیر اعلیٰ بلوچستان میر عبد القدوس بزنجو نے دعا کی کہ اللہ تعالیٰ مرحومین کی مغفرت اور لواحقین کو صبر جمیل عطا کرے۔

واضح رہے کہ مری میں گزشتہ برفباری کے باعث مختلف گاڑیوں کے اندر 21 افراد دم گھٹ کر جاں بحق ہوگئے ہیں۔