ٹینس کی دنیا کے مشہور کھلاڑی اور عالمی نمبر ایک نوواک جوکووچ آسٹریلیا کے شہر میلبرن سے ڈی پورٹ ہونے کے بعد دبئی پہنچ گئے۔

نوواک دو ہفتے قبل سال کے پہلے گرینڈ سلم آسٹریلین اوپن ٹینس میں شرکت کے لئے میلبرن پہنچے تھے مگر انہیں آسٹریلیا میں داخلے کی اجازت نہیں ملی۔

نوواک جوکووچ نے داخلے کی اجازت نہ دینے پر آسٹریلوی حکومت کے خلاف مقدمہ بھی کیا مگر فیصلہ ان کے خلاف آیا۔ انہوں دو مرتبہ ڈی پورٹ کئے جانے کے خلاف درخواست کی تھی۔

آسٹریلوی فیڈرل کورٹ نے دونوں درخواستوں کو مسترد کر دیا تھا۔

برطانوی خبر رساں ادارے کے مطابق اتوار کو فیڈرل کورٹ کے تینوں ججز نے حکومتی حکم نامے کو برقرار رکھتے ہوئے درخواست پر فیصلہ سنا دیا اور جوکووچ کے خلاف مقدمہ کا جرمابہ بھی عائد کرنے کا حکم دیا۔

فیصلے کے بعد سربین ٹینس اسٹار نوواک جوکووچ نے اپنے ایک بیان میں کہا کہ وہ فاضل عدالت کا احترام کرتے ہیں اور متعلقہ حکام سے تعاون کریں گے۔

واضح رہے کہ انہوں نے ویکسین لگائے بغیر آسٹریلیا میں داخل ہوئے تھے اور کہا تھا کہ انہیں طبی بنیادوں پر استثنیٰ حاصل ہے۔

آسٹریلوی امیگریشن کے وزیر الیکس ہاک نے کہا کہ کوئی بھی قانون سے بالا تر نہیں ہے اور نوواک جوکووچ کے ویزے کی منسوخی کا فیصلہ مفاد عامہ اور صحت کی وجوہات کی بنا پر کیا تھا۔

واضح رہے کہ ٹینس اسٹار نوواک جوکووچ کو آسٹریلین ٹینس اوپن کے علاوہ دیگر ٹورنامنٹس میں بھی شرکت کرنا ہے، جو کہ آئندہ چھ ماہ کے اندر ہونے ہیں۔

لیکن یہ بات ابھی تک واضح نہیں ہوئی کہ آیا نوواک جوکووچ بنا ویکسین کے مستقبل کے ایونٹس میں شرکت کر سکیں گے یا وہاں بھی انہیں پابندی کا سامنا کرنا پڑے گا۔