بلاول بھٹونے کہا ہے کہ عمران خان نے پیٹرولیم مصنوعات کی قیمتوں میں اضافہ کرکےعوام کو نئے سال کا تحفہ دے دیا ہے۔

پاکستان پیپلزپارٹی کے چیئرمین بلاول بھٹو زرداری نے اپنے بیان میں کہا کہ عمران خان نے بڑے دعوے سے کہا تھا کہ 2021 خوش حالی کا سال ہوگا۔ اب 2022 آگیاہے، خوش حالی کا وہ دعوی کہاں گیا؟

بلاول بھٹو نے کہا کہ نئے پاکستان میں ہرسال گزشتہ برس کی نسبت زیادہ مہنگا ثابت ہوا اور پھر کہتے ہیں کہ پچھلی حکومتیں نااہل تھیں۔ پاکستان پیپلزپارٹی کے دور میں تو بدترین عالمی معاشی بحران تھا مگر ہم نے مہنگائی کا بوجھ عوام کو اٹھانے نہیں دیا۔

چئیرمین پاکستان پیپلز پارٹی کا کہنا تھا کہ وفاقی حکومت فی الفور پیٹرولیم مصنوعات کی قیمتوں کو عالمی منڈی کی قیمتوں کے مطابق کم کرے۔ مہنگائی سے نجات کا واحد حل عمران خان کی حکومت کا خاتمہ ہے۔

پیٹرول کی قیمت میں مزید 4 روپے اضافہ

وزارت خزانہ کی جانب سے جاری کردہ نوٹی فکیشن کے مطابق پیٹرول کی قیمت میں 4 روپے اضافہ کیا گیا ہے جس کے بعد نئی قیمت 144 روپے اور82 پیسے فی لیٹر ہوگئی۔

ہائی اسپیڈ ڈیزل کی قیمت میں بھی 4 روپے کا اضافہ کیا گیا ہے جس کے بعد نئی قیمت 141 روپے اور 62 پیسے فی لیٹر ہوگئی۔ لائٹ ڈیزل کی فی لیٹر قیمت میں بھی 4 روپے 15 پیسے اضافے کے بعد نئی قیمت 111 روپے 6 پیسے فی لیٹر ہوگئی ہے۔

اس کے علاوہ مٹی کے تیل کی قیمت میں 3 روپے 95 پیسے مہنگا ہونے کے بعد اس کی نئی قیمت 113 روپے 53 پیسے فی لیٹر ہوگئی ہے۔

وزارت خزانہ کے مطابق قیتموں کا اطلاق آج یکم جنوری سے 15 جنوری تک ہوگا۔