سیلفی لیتے ہوئے 20 سالہ لڑکی جھولے سے گرکر جاں بحق ہوگئی۔

سوشل میڈیا کے بڑھتے ہوئے رجحان کے باعث آج کل کے نوجوان چند لائکس اور کمنٹ کی خاطر اپنی زندگیاں داؤ پر لگادیتے ہیں اور منفرد انداز میں تصویر لینے کے لیے ہر حد پار کردیتے ہیں جسے اگر ہم سیلفی جنون کہیں تو غلط نہ ہوگا۔

نوجوانوں کی جانب سے سیلفی لینے کا یہ جنون اب تک سیکڑوں جانیں لے چکا ہے لیکن یہ پھر بھی باز نہیں آتے اور اب بھی ٹرین کے آگے جاکر یا پھر کسی اونچے مقام پر پہنچ کر بغیر کچھ سوچے سمجھے اپنا موبائل نکال کر کھڑے ہوجاتے ہیں۔

یہ بھی پڑھیں؛ کار ڈوبی لیکن خاتون سیلفی لینا نہ بھولی!

ایسے ہی ایک خبر گوجرانوالہ سے سامنے آئی ہے کہ جہاں گلشن اقبال پارک میں جھولے پر سیلفی لینے کا شوق نوجوان لڑکی کو مہنگا پڑگیا۔

گوجرانوالہ پولیس کے مطابق 20 سالہ لڑکی نے اونچائی پر جانے کے بعد جھولے سے سیلفی بنانے کی کوشش کی لیکن وہ گرکر جاں بحق ہوگئی جس کے بعد گلشن اقبال پارک کو سیل کردیا گیا ہے۔

ریسکیو ذرائع کا کہنا ہے کہ جاں بحق ہونے والی لڑکی کی شناخت اقصیٰ کے نام سے ہوئی ہے جو کشتی والے جھولے میں سوار تھی اور سیلفی لینے کی کوشش میں توازن برقرار نہ رکھ سکی۔

اس سے قبل بھی ایک خبر سامنے آئی تھی کہ ایک خاتون نے جمے ہوئے دریا پر گاڑی چلائی اور اپنی ڈوبتی کار کے اوپر سیلفی لینے کھڑی ہوگئی۔