عدالت نے لاپتہ افراد کیس میں پراسیکیوٹرجنرل سندھ سے اپیل دائر کرنے پر وضاحت طلب کرلی۔ 

تفصیلات کے مطابق سپریم کورٹ کراچی رجسٹری میں لاپتہ افراد کیس میں ایف آئی آر درج کرنے پر پراسیکیوشن کی اپیل پر کیس کی سماعت کے دوران جسٹس قاضی فائزعیسیٰ پراسیکیوٹر جنرل سندھ فیض ایچ شاہ پر شدید برہم ہوئے۔

دورانِ سماعت اظہارِ برہمی کرتے ہوئے جسٹس قاضی فائزعیسٰی نے کہا کہ کیا یہ پولیس اسٹیٹ ہے؟ آئین اور قانون کو مذاق بنا رکھا ہے۔ آئین اور قانون کی دھجیاں بکھیرنا بند کریں۔

برہمی کا اظہار کرتے ہوئے جسٹس قاضی فائز نے کہا کہ کیا آپ شہریوں کو لاپتہ کرنے والوں کی سہولت کاری کررہے ہیں؟ جس پر پراسیکیوٹر جنرل سندھ نے جواب دیا کہ جی ایسا نہیں ہے۔

جسٹس قاضی نے کہا کہ بالکل ایسا ہی ہے، آپ سہولت کاری کا کام کر رہے ہیں۔ آپ کا کام کیا ملزمان کو تحفظ دینا ہے؟ کیا آپ ایس ایچ او ہیں جو ایف آئی آر درج کرنے نہ کرنے کا فیصلہ کریں گے؟

درخواست گزار محمد اقبال پٹیل نےعدالت سے کہا کہ میرے بھائی محمد ندیم پٹیل کو سی ٹی ڈی انچارج راجا عمر خطاب نے اغوا کیا ہے۔ سندھ ہائی کورٹ نے راجا عمر خطاب کے خلاف ایف آئی آر کا حکم دیا۔

جسٹس قاضی فائزعیسٰی نے پی جی سے استفسار کیا کہ بتائیں، آپ نے کس حثیت میں یہ اپیل دائر کی؟ کیا راجا عمر خطاب اتنا طاقتور ہے کہ آپ کے ادارے کو چلا رہا ہے؟

جسٹس قاضی فاائز عیسٰی نے ریمارکس میں مذید کہا کہ راجا عمر خطاب کے بجائے آپ کو اپیل کی ضرورت کیوں پیش آئی؟ آپ کو ایس ایچ او کے اختیارات کب سے مل گئے؟

جسٹس یحییٰ آفریدی دکھ ہوا کہ ریاست ایک ایف آئی آر کے خلاف اپیل کررہی ہے۔ کم از کم اتنا تو حق دیں کہ نام شامل ہوسکے کہ کس نے اغوا کیا۔ ایف آئی آر غلط درج ہو تو کٹوانے والے کے خلاف آپ کا حق ہے۔

پراسیکیوٹر جنرل سندھ فیض ایچ شاہ نے عدالت سے کہا کہ ایف آئی آر درج ہو جائے تو ہمیں اب کوئی اعتراض نہیں۔

جسٹس قاضی فائز عیسٰی نے کہا کہ ایف آئی آردرج کر کے کسی پراحسان کیا کیا؟ کیا احسان کر رہے ہیں یہ کرکے، آپ کی ذمہ داری ہے یہ۔ یہ کون سا طریقہ ہے جو مرضی آئے وہ کریں۔ کس قانون کے تحت آپ نے یہ فیصلہ کیا؟

سپریم کورٹ نے پراسیکیوٹر جنرل سندھ سے اپیل دائر کرنے پر وضاحت طلب کرتے ہوئے پراسیکیوٹر جنرل سندھ کو پیر کو وضاحت کے ساتھ دوبارہ پیش ہونے کی ہدایت کردی۔