مظفر گڑھ کے ضلع تحصیل علی پور میں تھانہ سٹی کی حدود فتح پور روڈ نزد کوڑے خان اسکول کے کمرے میں دھواں بھر جانے سے چار افراد بے ہوش ہوگئے ہیں۔

تفصیلات کے مطابق متاثرہ گھرانہ کے افراد سردی سے بچنے کے لئے رات کو کمرے میں لکڑیاں جلا کر سوئے تھے۔

ریسکیو حکام کے مطابق لکڑیاں جلنے کے باعث کمرے میں دھواں بھر جانے سے چاروں افراد بے ہوش ہوگئے۔

ریسکیو حکام کا کہنا ہے کہ ریسکیو 1122 پر اطلاع دی گئی کہ رات کو سونے والے 4 افراد اٹھ نہیں رہے بے ہوشی کی حالت میں ہیں۔

ریسکیو ٹیم موقعے پر پہنچی تو پتہ چلا کہ متاثرہ افراد کمرے میں لکڑیاں جلا کر سوئے تھے۔

ریسکیو حکام نے بتایا کہ چار افراد جن میں 35 سالہ زیب مائی، 10 سالہ سمیعہ ، 13 سالہ علی رضا اور 7 سالہ حسن کو تحصیل ہیڈ کوارٹر اسپتال منتقل کردیا گیا ہے۔

واضح رہے کہ متاثرہ افراد میں سے 2 کی حالت ابھی تک تشویشناک ہے۔