اکثر آپ نے پلے گراونڈز یا پارکس میں جمپنگ کیسل دیکھا ہوگا جس پر بچے اچھل کود اور تفریح کر کے محظوظ ہوتے ہیں۔ لیکن کس نے سوچا تھا یہ جمپنگ کیسل ایک دن کسی کی موت کا باعث بھی بن جائے گا۔

وزن میں ہلکا جمپنگ کیسل ایک ربر نما مواد سے بنا قلعہ نما غبارہ ہوتا ہے جسے ہوا بھر کر پھُلایا جاتا ہے، اور بچے اس پر کھیلتے ہیں۔

تاہم یہی جمپنگ کیسل ایک آٹھ سالہ بچی کے لیے موت کا پروانہ ثابت ہوا۔

اسپین کے شہر ویلینسیا کے قریب مسلاٹا سے تعلق رکھنے والی ایک آٹھ سالہ بچی باؤنسی قلعے پر کھیل رہی تھی کہ اچانک تیز ہوا کے جھونکے نے جمپنگ کیسل کو ہوا میں اڑا دیا۔

قلعے کے ہوا میں کئی فٹ تک اڑنے سے بچی زمین پر آگری، اس کا سر زمین سے ٹکرایا جس سے وہ شدید زخمی ہوگئی ہوگئی۔

بچی کو مقامی وقت کے مطابق رات 8 بجے کے بعد لا فے ہسپتال لے جایا گیا، جہاں صرف 12 گھنٹے بعد ہی اس کی موت ہو گئی۔

واقعے میں ایک چار سالہ بچی بھی شدید زخمی ہوئی ہے اور ہسپتال میں زیرِ علاج ہے۔

اس واقعے میں سات دیگر بچوں کو بھی معمولی چوٹیں آئیں اور وہ بھی علاج کے لیے اسپتال میں داخل ہوئے۔

پولیس کا کہنا ہے کہ اب اس بات کا تعین کرنے کے لیے تفتیش جاری ہے کہ آیا اس واقعے کا تعلق کہیں کسی غفلت سے تو نہیں تھا۔