وزیراعظم عمران خان کل چین کے دورے پر روانہ ہونگے۔

دفتر خارجہ کی جانب سے جاری کردہ شیڈول کے مطابق چینی قیادت کی خصوصی دعوت پر وزیراعظم پاکستان 3 سے 6 فروری تک چین کا دورہ کرینگے۔

وزیراعظم کے ہمراہ کابینہ کے ارکان اور اعلیٰ سرکاری افسران سمیت اعلیٰ سطح کا وفد بھی ہوگا۔

وزیراعظم ونٹر اولمپک گیمز کی افتتاحی تقریب میں شرکت کریں گے۔

اولمپک گیمز ایک عالمی ایونٹ کے طور پر دنیا کے لوگوں کے درمیان باہمی افہام و تفہیم، شمولیت اور دوستی کو فروغ دیتے ہیں۔

بیجنگ اولمپک گیمز کے موسم گرما اور سرما دونوں ایڈیشن کی میزبانی کرنے والا پہلا شہر بن جائے گا، چینی حکومت نے کورونا کے باوجود سرمائی اولمپک گیمز کے انعقاد کے لیے قابل تعریف انتظامات کیے ہیں۔

دورے کے دوران وزیراعظم چینی حکام کے ساتھ دوطرفہ ملاقاتیں کریں گے۔

چینی صدر شی جن پنگ اور وزیر اعظم لی کی چیانگ سے ملاقاتوں میں رہنما دو طرفہ تعلقات کے تمام پہلوؤں کا جائزہ لیں گے۔

سی پیک سمیت مضبوط تجارتی اور اقتصادی تعاون پر خصوصی توجہ دی جائے گی، دونوں ممالک کی قیادت اہم علاقائی اور بین الاقوامی امور پر بھی تبادلہ خیال کریں گے۔

وزیر اعظم کا دورہ پاکستان اور چین کے درمیان سفارتی تعلقات کے قیام کی 70 ویں سالگرہ کی یادگاری تقریبات کا اختتام ہوگا۔

وزیر اعظم کا دورہ پاکستان اور چین کے درمیان مضبوط شراکت داری کو نئی بلندیوں تک لے جانے کے لیے تجدید عہد ہوگا۔ دورے سے متعدد شعبوں میں تعاون کو مزید تقویت دے گا۔

وزیراعظم عمران خان کے دورے کے دوران متعدد ایم او یوز اور معاہدوں پر دستخط کیے جائیں گے۔

بیجنگ میں وزیراعظم چین کے ممتاز کاروباری رہنماؤں اور چین کے سرکردہ تھنک ٹینکس، تعلیمی اداروں اور میڈیا کے نمائندوں سے بھی ملاقات کریں گے۔