ماہریِنِ آثارِ قدیمہ نے اعلان کیا ہے کہ ابوظہبی میں دریافت ہونے والی ایک قدیم بستی میں 8500 سال پرانی تعمیرات دریافت ہوئی ہیں جو پورے متحدہ عرب امارات میں سب سےقدیم آبادی بھی ہے۔

ابوظہبی محکمہ آثاروتہذیب کے مطابق اس سے پہلے جتنے بھی آثار خطے سے ملے ہیں کہ ان سے بھی 500 سال زائد پرانی ہے۔ ابوظہبی کی مغرب میں ٖغغہ نامی علاقے سے یہ آثار ملے ہیں۔

عمارتوں کی ساخت بہت سادہ ہے اور کمرے گول یا بیضوی شکل میں بنائے گئے ہیں۔ ان کمروں کی دیواریں پتھروں سے بنائی گئی ہیں جن کی اوسط بلندی تین اعشاریہ تین فٹ ہے۔

ماہرین کے مطابق یا تو یہ چھوٹی سی آبادی کے لیے رہائشی کمرے تھے یا پھر عارضی گھر تھے جہاں لوگ ایک سال تک رہا کرتے تھے۔

اس سے ثابت ہوتا ہے کہ ابوظہبی میں بھی نیولیتھک (قدیم پتھر کے بعد) کے دور کے لوگ موجود تھے اور وہ باقاعدہ بستیوں کی شکل میں رہا کرتے تھے۔ آثار سے سینکڑوں چھوٹی اشیا اور نوادرات ملے ہیں جن میں پتھرکو گھس کر تیز بنائے گئے تیر، اور سمندری اشیا سے ڈھالی گئی اشیا بھی موجود ہیں۔ خیال ہے کہ پتھر کے نوکیلے اوزار شکار کے لیے استعمال کئے جاتےتھے۔