حافظ حمداللہ نے کہا ہے کہ عمران نیازی وزیراعظم نہیں بلکہ آئی ایم ایف کے منشی ہیں۔

ترجمان پی ڈی ایم حافظ حمداللہ نے بجلی کی قیمت میں اضافے پر ردعمل دیتے ہوئے کہا ہے کہ پی ڈی ایم بجلی کی قیمت میں اضافے کومسترد کرتی ہے۔

انہوں نے کہا کہ یہ اضافہ آئی ایم ایف کے احکامات پرہو رہا ہے، ملک پرعمران اینڈ کمپنی کی حکومت نہیں ہے بلکہ آئی ایم ایف کی حکومت ہے ، عمران خان نے اسٹیٹ بینک آئی ایم ایف کی جھولی میں گروی رکھ دیا ہے۔

حافظ حمداللہ نے کہا ہے کہ عمران نیازی وزیراعظم نہیں بلکہ آئی ایم ایف کے منشی ہیں، آئے روز بجلی کی قیمتوں میں اضافے نے عوام کی زندگی مشکل بنا دی ہے، 22 کروڑ عوام اورملک کا کوئی والی وارث نہیں۔

ترجمان پی ڈی ایم حافظ حمداللہ نے کہا ہے کہ ساڑھے تین سال سے ملک پرعمران اینڈ کمپنی کی صورت میں عذاب مسلط ہے، پی ڈی ایم عدم اعتماد کی تحریک اور لانگ مارچ کے ذریعے قوم کو اس عذاب سے نجات دلائے گی۔

واضح رہے کہ نیپرا نے بجلی کی قیمت میں ماہانہ فیول چارجز ایڈجسٹمنٹ کی مد میں 3  روپے 10 پیسے   فی یونٹ اضافے کی منظوری دے دی۔

نیشنل الیکٹرک پاور ریگولیٹری اتھارٹی (نیپرا) نے ماہانہ فیول چارجز ایڈجسٹمنٹ  برائے دسمبر 2021 کی مد میں  بجلی کی قیمت میں 3 روپے 10 پیسے فی یونٹ اضافے کا نوٹیفیکیشن جاری کردیا۔

سینٹرل پرچیزنگ پاور ایجنسی (سی پی پی اے) نے 3 روپے 12 پیسے فی یونٹ اضافے کی درخواست کی تھی جس پر  نیپرا نے یکم  فروری 2022 کو ایف سی اے پر عوامی سماعت کی تھی۔

نوٹیفیکیشن کے مطابق اس کا اطلاق صرف فروری کے مہینے کے بلوں پر ہوگا۔

نیپرا کے نوٹیفیکیشن میں بتایا گیا ہے کہ اس سے قبل نومبر کا فیول چارجز ایڈجسٹمنٹ صارفین سے 4 روپے 30 پیسے جنوری میں چارج کیا گیا تھا جو کہ صرف ایک ماہ کے لیے تھا۔

دسمبر کا فیول چارجز ایڈجسٹمنٹ نومبر کی نسبت ایک روپے 20 پیسے فروری میں کم چارج کیا جائے گا۔

نیپر اکا کہنا تھا کہ اس کا اطلاق ڈسکوز کے تمام صارفین ماسوائے لائف لائن صارفین پر ہوگا۔ فیول پرائس ایڈجسٹمنٹ کا اطلاق کے الیکٹرک صارفین پر بھی نہیں ہوگا۔