وزیراعلیٰ پنجاب نے کہا ہے کہ استعفوں اور لانگ مارچ کے بعد اب اپوزیشن نے عدم اعتماد کا شوشہ چھوڑا ہے۔

اپنے ایک بیان میں وزیراعلیٰ پنجاب سردار عثمان بزدار نے کہا کہ اپوزیشن میں لانگ مارچ کرنے کی بھی ہمت نہیں۔

سردار عثمان بزدار نے کہا کہ عدم اعتماد کا شوشہ صرف چائے کی پیالی میں طوفان کے مترادف ہے۔

وزیراعلیٰ پنجاب کا کہنا تھا کہ نمبر گیم میں حکومت کو واضح سبقت حاصل ہے، تمام اپوزیشن اکٹھی بھی ہوجائے تو بھی عدم اعتماد کامیاب نہیں ہوگی۔

عثمان بزدار نے کہا کہ استعفوں اور لانگ مارچ کے بعد اب اپوزیشن نے عدم اعتماد کا شوشہ چھوڑا ہے لیکن یہ نہ عدم اعتماد لا سکتے ہیں نہ استعفے دے سکتے ہیں۔

ان کا کہنا تھا کہ اپوزیشن عدم اعتماد لانا چاہتی تو شوق پورا کر لے، عدم اعتماد کے غبارے سے آئندہ چند روز میں ہوا نکل جائے گی۔

وزیراعلیٰ پنجاب سردار عثمان بزدار کا مزید کہنا تھا کہ اپوزیشن کو پہلے کی طرح اس بار بھی ہزیمت کا سامنا کرنا پڑے گا، جس اپوزیشن اتحاد پر اس کی اپنی جماعتیں عدم اعتماد کر چکی ہوں انہیں عدم اعتماد کی باتیں کرنا زیب نہیں دیتا۔