فوٹو اینڈ ویڈیو شئیرنگ ایپ انسٹاگرام پر عمران ہاشمی کے ہم شکل پاکستانی نوجوان مزداک جان کی ویڈیوز وائرل ہورہی ہیں۔

سوشل میڈیا پر آئے دن ایسے افراد کی تصاویر وائرل ہوتی رہتی ہیں جو کسی مشہور اداکار یا کسی فنکار سے مشابہت رکھتے ہوں، ایسی ہی چند ویڈیوز اور تصاویر آج کل انسٹاگرام پر وائرل ہو رہی ہیں جس میں دیکھا جا سکتا ہے کہ پاکستان کا ایک نوجوان بھارتی مشہور اداکار عمران ہاشمی سے ہوبہو ملتا ہے۔

انسٹاگرام پر عمران ہاشمی کے ہم شکل پاکستانی نوجوان مزداک جان کی وائرل ہونے والی ان ویڈیوز میں انہیں عمران ہاشمی کے گانے پر لپ سنکنگ کرتے دیکھا جاسکتا ہے۔

عمران ہاشمی سے مشابہت رکھنے والے اس نوجوان کا تعلق پاکستان کے صوبے خیبر پختون خواہ سے ہے جو عمران ہاشمی سے بےحد مشابہت رکھنے پر اس سے قبل بھی لوگوں کی توجہ کا مرکز بن چکے ہیں اور اس سے قبل بھی ان کی کئی ویڈیوز اور تصاویر سوشل میڈیا کی زینت بن چکی ہیں۔

جس پر اصلی عمران ہاشمی بھی حیران رہ گئے تھے اور انہوں نے اپنے سوشل میڈیا اکاؤنٹ پر مزداک کی تصاویر شیئر کرتے ہوئے رد عمل کا اظہار کیا تھا۔

عمران ہاشمی نے اپنی پوسٹ میں لکھا تھا کہ یہ چیٹر کون ہے جس نے میرے خدوخال چرانے کی کوشش کی۔

یاد رہے کہ گزشتہ دنوں بھارتی اداکار اور کترینہ کیف کے شوہر وکی کوشل کے پاکستانی ہمشکل کی تصاویر بھی سوشل میڈیا پر وائرل ہوئی تھیں۔