راناثناءاللہ نے کہا ہے کہ 28 مارچ کو تحریک عدم اعتماد پیش کی جائے گی۔

مسلم لیگ ن کے رہنما راناثناءاللہ نے میڈیا سے گفتگو کرتے ہوئے کہا ہے کہ عدم اعتماد کی تحریک کے لئے دن فکس ہوچکا ہے، 28 مارچ کو تحریک عدم اعتماد  پیش کی جائے گی۔

انہوں نے کہا کہ حکومت کے پاس صرف 10 دن رہ گئے ہیں، 7 روز میں تحریک عدم اعتماد پرووٹنگ ہو جائے گی، آج عدم اعتماد پر دن مقرر ہوچکا ہے، عدم اعتماد کی تحریک آئینی و قانونی راستہ ہے۔

راناثناءاللہ نے کہا کہ عمران نیازی ڈھٹائی سے جھوٹ بولتے ہیں، اجلاس میں اپوزیشن کی 100 فیصد حاضری تھی، آج 172 سے زیادہ ہمارے نمبرز تھے، کل حکومت کہہ رہی تھی ہمارا بھی ان کے بندوں سےرابطہ ہے، آپ نےجہاں رابطے رکھ کرسیاست کی وہاں سے بھی رابطہ منقطع ہوچکا ہے۔

مسلم لیگ ن کے رہنما نے کہا کہ حکومت کے پاس10 دن رہ گئے ہیں، حکومت اپنا بوریا بستر باندھ لے، اسپیکر ٹائیگر فورس کے ممبر بنے ہوئے ہیں، 26 مارچ کو سڑکوں پر نکل رہے ہیں۔