احسن اقبال نے کہا ہے کہ آج پی ٹی آئی نے پنجاب اسمبلی میں غنڈہ گردی کا مظاہرہ کیا ہے۔

مسلم لیگ ن کے رہنما احسن اقبال نے ٹوئٹر پر جاری ایک پیغام میں کہا ہے کہ آج پی ٹی آئی نے وزیر اعلیٰ کے چناؤ کے موقع پہ شکست سے بچنے کیلئے جس شرمناک غنڈہ گردی کا پنجاب اسمبلی میں مظاہرہ کیا ہے وہ جمہوریت کیلئے سیاہ باب اور ان کی فسطائیت کا ثبوت ہے۔

آج پی ٹی آئی نے وزیر اعلی کے چناؤ کے موقع پہ شکست سے بچنے کے کئے جس شرمناک غنڈہ گردی کا پنجاب اسمبلی میں مظاہرہ کیا ہے وہ جمہوریت کے لئے سیاہ باب اور ان کی فسطائیت کا ثبوت ہے-

— Ahsan Iqbal (@betterpakistan) April 16, 2022

واضح رہے کہ پنجاب اسمبلی میں وزیر اعلیٰ کے انتخاب کے لئے اجلاس سے قبل شدید ہنگامہ ارائی کا واقعہ پیش آیا جس دوران ڈپٹی اسپیکر دوست مزاری کو حکومتی ارکان کی جانب سے شدید تشدد کا نشانہ بنایا گیا ہے۔

ہاتھا پائی میں سابق صوبائی وزیر خیال کاسترو سمیت سابق مشیر وزیر اعلیٰ عمر فاروق بھی شامل تھے جبکہ اسمبلی ممبران اور سیکیورٹی اہلکاروں نے بیچ بچاؤ کروایا ۔

بعد ازاں ڈپٹی اسپیکر ایوان چھوڑ کر چلے گئے۔

یاد رہے کہ پنجاب اسمبلی میں نئے قائد ایوان کا انتخاب آج ہو رہا ہے۔

سیکیورٹی انتہائی سخت

پنجاب سمبلی میں کسی بھی ناخوشگوار واقعے سے نمٹنے کے لیے سیکیورٹی کے سخت انتظامات کئے گئے ہیں۔

اسمبلی کے اطراف دفعہ 144 نافذ ہے ۔

’نیتیں شفاف نہیں‘

وزارتِ اعلیٰ کے امیدوار چوہدری پرویز الہٰی نے اسمبلی آمد کے موقع پر میڈیا سے بات کرتے ہوئے کہا کہ آج وہ اسمبلی کے کسٹوڈین نہیں بلکہ وزارتِ اعلیٰ کا امید وار ہیں۔

پرویز الہیٰ نے کہا کہ کوشش کریں گے الیکشن شفاف ہو، لیکن نیتیں شفاف نہیں، وقت ثابت کرے گا کہ ڈپٹی اسپیکر ایماندار ہے یا نہیں۔