خیبرپختونخوا فوڈ سیفٹی اتھارٹی نے سوات، ڈی آئی خان اور بنوں میں کارروائی کرتے ہوئے بیکریاں سیل کردی ہیں۔

تفصیلات کے مطابق فوڈ سیفٹی اتھارٹی نے اوڈیگرام سوات میں بیکریوں پر چھاپے مار کر گندے انڈوں کے استعمال پر 2 بیکریاں سیل کردی ہیں۔

فوڈ سیفٹی اتھارٹی کے مطابق کریک ڈاؤن میں بیکری کے گودام سے 1500 سے زائد گندے انڈے برآمد کرلئے گئے، جن سے مختلف بیکری پراڈکٹس کی تیاری میں استعمال کیا جارہا تھا۔

دوسری کارروائی ڈی آئی خان میں کی گئی جہاں فوڈ سیفٹی اتھارٹی نے صفائی کی ابتر صورتحال پر اچار کی دکان سیل کردی۔

اس کے علاوہ چارسدہ اور بنوں میں زائد المعیاد خوردنی تیل کے استعمال اور ناقص صفائی پر دو بیکری یونٹس سیل کیے، انسپکشن کے دوران سیل کئے گئے بیکریوں میں حفظان صحت کے اصولوں کی خلاف ورزی بھی پائی گئی۔

فوڈ سیفٹی اتھارٹی کا کہنا ہے کہ خلاف ورزی کرنے والی بیکری مالکان کو مزید کارروائی کے لئے دفتر میں طلب کیا گیا اور قانون کے مطابق مزید کارروائی کی جائیگی۔