وزیر خارجہ پاکستان بلاول بھٹو زرداری نے کہا ہے کہ فوڈ سیکیورٹی صرف پاکستان کا نہیں اب دنیا بھر کا مسئلہ بن چکا ہے۔

نیویارک مین پریس کانفرنس کرتے ہوئے وزیر خارجہ بلاول بھٹو نے کہا ہے کہ پاکستان میں فوڈ سیکیورٹی کے مسائل ہیں جس کی وجہ سے گندم کی پیداور میں کمی ہوئی ہے۔

بلاول بھٹو نے کہا کہ پاکستان میں بڑی فصلوں کی پیداوار میں اضافے کے اقدامات کریں گے اور کسانوں کی پیداواری لاگت کم کرنے کا منصوبہ بھی بنایا جارہا ہے۔

انہوں نے بتایا کہ ٹریڈ ہماری خٓرجہ پالیسی کی اولین ترجیح ہے اور اسی کے تحت جہاں سے اچھا سودا ہوگا وہاں سے گندم منگوائیں گے۔

اس موقع پر وزیر خارجہ بلاول بھٹو زرداری نے اقوام متحدہ اور عالمی برادری پر زور دیا ہے کہ وہ دنیا میں غذائی عدم تحفظ اور تنازعات کی بنیادی وجوہات کو دور کرنے کے لیے قائدانہ کردار ادا کریں۔

دورہ روس پر وزیر خارجہ کا بیان:

انہوں نے کہا کہ سابق وزیر اعظم عمران خان کے دورہ روس کا دفاع کرتاہوں کہ انہوں نے خارجہ پالیسی کے تحت روس کا دورہ کیا تھا۔

انہوں نے مزید کہا کہ ہم سمجھتے ہیں جنگ کسی بھی مسئلے کا حل نہیں ہے۔

بلاول بھٹو کا کہنا تھا کہ اس دورے میں کئی ملکوں سے باہمی تجارت پر بات ہوئی ہے جبکہ اطالوی وزیر خارجہ سے ملاقات میں باہمی دلچسپی کےامور پر بات چیت کی گئی ہے۔

افغان امریکہ تعلقات:

افغانستان میں انسانی بحران پر بات کرتے ہوئے وزیر خارجہ نے کہا کہ ملک کے 95 فیصد لوگ براہ راست تنازعات کے نتیجے میں غربت کے خطرے سے دوچار ہیں۔

ان کا کہنا تھا کہ امریکہ نے افغان حکومت سے معاہدے کئے، افغان حکومت نے وعدہ کیا کہ وہ اپنی  سرزمین کسی کے خلاف استعمال نہیں ہونے دے گی۔

انہوں نے مزید کہا کہ اگرافغانستان حکومت ناکام ہوگئی اندازہ لگائیں کیا ہوگا، کیا عالمی برادری انتہائی خطرناک مسلئلے سے نمٹ سکے گی؟

وزیر خارجہ نے کہا کہ افغناستان کو پھر تنہا چھوڑا تو انسانی بحران سمیت کئی المیے جنم لیں گے، مقبوضہ کشمیر اور فلسطین کے معاملے پر پاکستان میں یکسوئی ہے اور ان کا مسئلہ عالمی سطح پر اٹھاتے رہیں گے۔

انہوں نے کہا کہ پاکستان سمجھتا ہے کہ صرف مذاکرات اور سفارت کاری ہی تنازعات کو ختم کرنے کا واحد راستہ ہے۔

پاکستان کی موجودہ سیاسی صورتحال:

انہوں نے کہا کہ اپوزیشن کاحق ہے کہ احتجاج کرے، اپنی سیاست کرے لیکن عمران خان انتہاپسندی کی سیاست کی طرف بڑھ رہےہیں اور انتہا پسندی سے لڑنا ہماری اولین ترجیح ہے۔

انہوں نے مزید کہا کہ عمران خان جمہوری، پارلیمانی اور آئینی سیاست نہیں کررہے ہیں، وہ اداروں اور سیاسی مخالفین پر جھوٹے الزامات لگارہے ہیں۔

بلاول بھٹو کا کہنا تھا کہ عمران خان کوذمہ داراپوزیشن کا کردار ادا کرنا چاہیے ورنہ انہیں سوالات کاجواب دینا پڑے گا۔