پاکستان تحریک انصاف کی جانب سے 25 مئی کو لانگ مارچ کو کامیاب ہونے سے روکنے کے لئے حکومت کی جانب سے مختلف اقدامات پر مشاورت جاری ہے۔

اس سلسلے میں ابتدائی طور پر حکومت کی جانب سے اسلام آباد کے ریڈ زون کو کنٹینر لگا کر سیل کرنے کا فیصلہ کیا گیا ہے۔

ریڈ زون جانے والے دیگر تمام راستوں کو بھی آج رات سے سیل کردیا جائے گا جبکہ صرف مارگلہ روڈ کو کھلا چھوڑا جائے گا۔

خیال رہے کہ ریڈ زون کی جانب ڈی چوک پہلے ہی کنٹینرز لگا کر سیل رکھا گیا ہے۔

بعدازاں حکومت اور اتحادیوں نے مشاورت کے بعد پی ٹی آئی کے حقیقی آزادی کے لانگ مارچ کو نہ روکنے کا فیصلہ کیا ہے۔

ذرائع کا کہنا ہے کہ مشاورت کے دوران اس بات پر اتفاق کیا گیا ہے کہ پی ٹی آئی کو قانون کی حدود میں رہتے ہوئے لانگ مارچ کی اجازت دی جائیگی۔

اس کے ساتھ ہی فیصلہ کیا گیا ہے کہ پاکستان تحریک انصاف کے لانگ مارچ کو سری نگر ہائی وے  تک محدود کیا جائیگا تاہم سری نگر ہائی وے سے آگے آنے کی صورت میں قانونی راستہ اپنایا جائے گا۔

ذرائع کا کہنا ہے کہ حکومت اور اتحادیوں کے آج کے اجلاس میں پی ٹی آئی مارچ پر مزید مشاورت بھی ہوگی جس میں نواز شریف ویڈیو لنک کے ذریعے شریک ہوں گے۔

یاد رہے کہ گزشتہ روز پشاور میں کورکمیٹی کے اجلاس کے بعد پریس کانفرنس کرتے ہوئے سابق وزیراعظم عمران خان نے  25 مئی کو اسلام آباد لانگ مارچ کا اعلان کیا ہے۔