وزیراعظم آزاد کشمیر سردار تنویر الیاس نے عید کا پہلا روز کنٹرول لائن پر گزارنے کا فیصلہ کیا ہے۔

تفصیلات کے مطابق وزیراعظم آزاد کشمیر سردار تنویر الیاس نماز عید مظفرآباد میں پڑھنے کے بعد ایل او سی کا دورہ کریں گے اور  پاک فوج کے جوانوں سے بھی ملیں گے۔

 وزیر اعظم سردار تنویر الیاس بھارتی فائرنگ سے متاثرہ خاندانوں سے ملیں گے اور مہاجرین کے کیمپوں میں بھی جائیں گے۔

گزشتہ روز سردار تنویر الیاس خان نے کہا تھا کہ ہماری افواج ایل او سی پر مکمل طور پر چوکس ہیں، پاک فوج کے ہوتے ایل او سی پر ایک پتہ بھی ہل نہیں سکتا۔

انہوں نے کہا تھا کہ پاک فوج کی بہادری کو سلام پیش کرتے ہیں، عید کی خوشیوں میں ایل او سی پر موجود جوانوں کو یاد رکھیں گے، عید ایل او سی پر موجود جوانوں کے ساتھ منائیں گے۔

وزیر اعظم آزاد کشمیر سردار تنویر الیاس خان کا مزید کہنا تھا کہ مہاجر کیمپس اور یتیم خانوں میں مزدوروں کیلئے سرائے بنائیں گے، مزدور ان مقامات پر ٹھہر سکیں گے۔