اسلام آباد میں سیاسی بے چینی نے فیفا ٹرافی ٹور 2022 کے منتظمین کو ایونٹ کو لاہور منتقل کرنے پر مجبور کردیاہے۔

تفصیلات کے مطابق فیفا ٹرافی ٹور کے ایک عہدیدار نے تصدیق کی کہ ٹور کی تاریخوں میں کوئی تبدیلی نہیں کی گئی ہے صرف مقام اسلام آباد سے لاہور منتقل ہوا ہے۔

منتظمین نے کہا کہ ٹرافی 7 جون 2022 کو لاہور پہنچے گی، اور یہ شائقین کے لیے فٹ بال کے سب سے مشہور انعام کو قریب سے دیکھنے کا ایک غیر معمولی موقع ہے۔

یہ ایونٹ پہلے اسلام آباد میں ہونا تھا لیکن وفاقی دارالحکومت میں سیاسی طور پر جو کچھ ہو رہا ہے اس کی وجہ سے منتظمین کو تقریب کو منتقل کرنا پڑا۔

فرانس سے تعلق رکھنے والے سابق ورلڈ کپ فاتح کرسچن کریمبیو ٹرافی کے ساتھ پاکستان آئیں گے،ٹرافی ازبکستان سے پاکستان پہنچے گی اور ایک دن ملک میں قیام کرے گی۔

ہوائی اڈے پر ایک استقبالیہ تقریب کے بعد، دوپہر میں اسٹیک ہولڈرز اور اسپانسرز کے لیے ایک تقریب اور شام کو ایک عوامی کنسرٹ ہو گا۔

واضح رہے کہ یہ دوسرا موقع ہے جب فیفا ورلڈ کپ ٹرافی نے پاکستان کا دورہ کیا ہے۔