وزیر مملکت برائے امور خارجہ حنا ربانی کھرنے یوکرین کے حوالے سے ہونے والی ڈونرز کانفرنس میں بہ ذریعہ ویڈیو لنک شرکت کی۔

ترجمان دفتر خارجہ کی جانب سے جاری بیان کے مطابق پولینڈ کے دارالحکومت وارسو میں ہونے والی ہائی لیول ہونے والی کانفرنس سے خطاب میں وزیر مملکت برائے خارجہ حنا ربانی کھر کا کہنا تھا کہ کانفرنس کے انعقاد میں پولینڈ اور سوئیڈن کے وزرائے اعظم کا کردار قابل تحسین ہے۔

حنا ربانی کھر نے یوکرین میں جاری جنگ میں عام شہریوں کی ہلاکت اور مہاجرین کو درپیش مسائل پر اظہار تشویش کیا۔

وزیر مملکت برائے خارجہ امور نے طاقت کےعدم استعمال، علاقائی خودمختاری اور پائیدارامن و سلامتی کے لیے اقوام متحدہ کے چارٹر کو نافذ کرنے کے لیے پاکستان کے اصولی مؤقف پر بات کی۔

ان کا مزید کہنا تھا کہ پاکستان یوکرین جنگ کے جلد خاتمے کے لیے مسلسل سفارتی سطح پر کوششوں اور با مقصد مذاکرات پر زور دے رہا ہے۔

وزیر مملکت برائے خارجہ امور نے کانفرنس کے شرکاء کو بتایا کہ پاکستان یوکرین کے عوام کی مدد کے لیے انسانی  ہمدردی کی بنیادوں پر امدادی سامان کی دوسری کھیپ بھیجنے کے لیے اقدامات کر رہا ہے۔

15 ٹن امدادی سامان کی پہلی کھیپ مارچ میں روانہ کی گئی تھی۔ جس میں ادویات، اشیائے خورد و نوش اور دیگر اہم اشیاء شامل تھیں۔