گزشتہ روز پنجاب سے بازیاب کرائی جانے والی 14 سالہ لڑکی دعا زہرا اور اسکے شوہر کو آج کراچی منتقل کردیا گیا ہے۔

تفصیلات کے مطابق 1 ماہ اور 21 زور بعد شہر کراچی سے تعلق رکھنے والی لڑکی دعا کو سندھ ہائی کورٹ کے احکامات پر بازیاب کرالیا گیا ہے۔

پنجاب پولیس کی جانب سے قانونی کارروائی مکمل ہوجانے کے بعد آج دعا زہرا اور اس کے شوہر ظہیر کو کراچی پولیس کے حوالے کردیا گیا ہے تاہم لڑکی کے والدین کو عدالت میں پیش ہونے قبل ملنے کی اجازت نہیں دی جائے گی۔

واضح رہے کہ دعا زہرا کی بازیابی کے لیے سندھ پولیس نے سانگھڑ میں بھی چھاپے مارے تھے جبکہ دعا زہرہ نے 26 اپریل کو لاہور میں پولیس کو شوہر کے ساتھ رہنے کا بیان دیا تھا۔

سندھ ہائیکورٹ نے دعا زہرہ کو 10 جون کو عدالت میں پیش کرنے کا حکم دے رکھا ہے جبکہ چند روز قبل سندھ پولیس نے دعا زہرا کی بازیابی کے لیے وزارت داخلہ سے مدد مانگی تھی۔

اس حوالے سے جاری خط میں لکھا گیا ہے کہ  وفاقی کی جانب سے دعا زہرا کی بازیابی کے لیے پنجاب، خیبر پختونخواہ اور آزاد کشمیر کے آئی جیز کو سندھ پولیس سے تعاون اور معاونت کی ہدایت کی جائے۔

خط میں بتایا گیا ہے کہ سندھ ہائیکورٹ نے دعا زہرا کو 10 جون کو عدالت میں پیش کرنے کا حکم دے رکھا ہے۔

اسکے علاوہ سوشل میڈیا کے ذریعے دعا زہرا اور ظہیر سے متعلق معلومات دینے کی درخواست کی گئی تھی۔