گورنر پنجاب محمد بلیغ الرحمان نے کہا ہے کہ اتحادی اور حکومت عوام کی فلاح بہبود کے لیے ایک پیج پر ہیں۔

گورنر محمد بلیغ الرحمان سے صوبائی وزیر علی حیدر گیلانی کی ملاقات ہوئی جس میں باہمی دلچسپی کے امور اور سیاسی صورتحال پر گفتگو کی گئی۔

ملاقات میں گورنر پنجاب نے گفتگو کرتے ہوئے کہا کہ جنوبی پنجاب کی تعمیر، ترقی حکومت کی ترجیحات میں ہے۔

انہوں نے کہا کہ مسلم لیگ ن اور اتحادی جماعتیں ملک میں معاشی استحکام اور ترقی کے لیے کام کر رہی ہیں، اتحادیوں کے ساتھ مل کر جمہوری اقدار کو آگے بڑھائیں گے۔

محمد بلیغ الرحمان نے مزید کہا کہ اتحادی اور حکومت عوام کی فلاح بہبود کے لیے ایک پیج پہ ہیں، حکومت عوام کو ریلیف دینے کے لیے لوڈشیڈنگ اور مہنگائی پر قابو پانے کے لیے جنگی بنیادوں پر اقدامات کر رہی ہے۔

دوسری جانب علی حیدر گیلانی نے کہا کہ صوبے کی ترقی اور عوام کی خدمت کے لیے تمام تر صلاحیتیں استعمال کروں، جنوبی پنجاب کے عوام کے مسائل کا حل ترجیح ہے۔