آسٹریلوی ٹیم کے سابق آل راؤنڈر شین واٹسن نے جوش ہیزل ووڈ کی تعریف کرتے ہوئے کہا ہے کہ وہ  ٹی ٹوئنٹی فارمیٹ میں آسٹریلیا کے بہترین باؤلر ہیں۔

شین واٹسن نے اپنے ایک بیان میں کہا کہ میں نے ہمیشہ سوچا کہ وہ صرف ایک ٹیسٹ اور ون ڈے باؤلر ہیں کیونکہ اس کے پاس ٹی  ٹوئنٹی کرکٹ میں اتنے زیادہ دفاعی آپشن نہیں تھے، لیکن اس نے پچھلے دو سالوں میں بہت ترقی کی ہے۔

واضح رہے کہ ہیزل ووڈ نے گزشتہ سال آسٹریلیا کو اپنا پہلا ٹی ٹوئنٹی  ورلڈ کپ ٹائٹل جتوانے میں اہم کردار ادا کیا تھا کیونکہ وہ صرف دو تیز گیند بازوں میں شامل تھے جنہوں نے ٹاپ فائیو وکٹ لینے والوں کی فہرست میں جگہ بنائی تھی۔

یہ بھی پڑھیں: ٹی ٹوئنٹی سیریز: آسٹریلوی اوپنرز نے ہی ہدف پورا کر دیا

حال ہی میں انہوں نے رائل چیلنجرز بنگلور کے لیے انڈین پریمیئر لیگ (آئی پی ایل) میں اچھی کارکردگی کا مظاہرہ کیا اور 12  میچز میں 20 وکٹیں حاصل کیں۔

واضح رہے کہ سری لنکا کے خلاف ٹی ٹوئنٹی سیریز کے پہلے میچ میں جوش ہیزل ووڈ نے شاندار بولنگ کا مظاہرہ کرتے ہوئے 16 رنز کے عوض 4 وکٹیں حاصل کیں جس پر انہیں مین آف دی میچ کا ایوارڈ بھی دیا گیا۔