جمعیت علماء اسلام کے سربراہ مولانا فضل الرحمان کی طبیعت ناساز ہونے کے معاملے پر ڈاکٹرز نے ان کو مکمل آرام کا مشورہ دے دیا ہے۔

تفصیلات کے مطابق مولانا فضل الرحمان کا آج اسپتال میں دوسرا روز ہے، لاہور کے اتفاق اسپتال میں انکا علاج جاری ہے۔

ذرائع کے مطابق پی ڈی ایم اور جے یو آئی (ف) کے سربراہ مولانا فضل الرحمان کو آج شام تک اسپتال میں رکھا جائے گا جبکہ ان کے ضروری ٹیسٹ مکمل کر لئے گئے ہیں۔

ذرائع نے بتایا کہ مولانا فضل الرحمان جگر اور پھیپھڑوں کی تکلیف میں مبتلا ہیں، ڈاکٹرز نے انکو مکمل آرام کا مشورہ دیا ہے۔

خیال رہے کہ وزیراعظم شہباز شریف کی ہدایت پر مولانا فضل الرحمان لاہور اتفاق اسپتال میں داخل ہوئے۔

واضح رہے کہ گزشتہ روز مولانا فضل الرحمان کی طبیعت خراب ہونے پر اسپتال منتقل کیا گیا تھا جہاں ان کا چیک اپ کیا گیا۔

ذرائع جے یو آئی کا کہنا تھا کہ مولانا فضل الرحمان اسپتال میں چند دن قیام کریں گے۔

دوسری جانب وزیراعظم شہباز نے گزشتہ روز اسپتال میں مولانا فضل الرحمان کی عیادت بھی کی تھی۔

وزیراعظم نے مولانا فضل الرحمان کو گلدستہ پیش کیا اور ان کی جلد صحت یابی کے لیے نیک خواہشات کا اظہار کیا۔