پنجاب پولیس کے یوم شہداء کے موقع پر وزیراعلیٰ پنجاب چوہدری پرویزالہیٰ نے پولیس شہداء کی بیواؤں کی پینشن میں اضافے کا اعلان کیا ہے۔

وزیراعلیٰ چوہدری پرویزالہیٰ نے یومِ شہدائے پولیس کے موقع پر اپنے ویڈیو پیغام میں کہا کہ پنجاب پولیس کے جوانوں نے اپنی قیمتیں جانیں دے کر صوبے کا تحفظ کیا۔

چوہدری پرویزالہیٰ نے پنجاب پولیس کے شہداء کو خراج عقیدت پیش کرتے ہوئے کہا کہ پولیس کے شہداء ہمارے ہیروہیں، ان کی قربانیاں ہمیشہ یاد رکھی جانی چاہیں۔

وزیراعلیٰ پنجاب نے آئی جی پنجاب کو شہداء کے اہل خانہ کی مکمل دیکھ بھال کی ہدایت دی ہے اور شہداء کی بیواؤں کی پینشن میں اضافے کا بھی اعلان کیا ہے۔

وزیراعلیٰ چوہدری پرویزالہیٰ نے مزید کہا کہ شہداء کے اہل خانہ کی دیکھ بھال سب کا فرض بنتا ہے۔

اس سے قبل یومِ شہدائے پولیس کے موقع پر پیغام دیتے ہوئے صدر مملکت ڈاکٹر عارف علوی نے کہا کہ  ملک کی داخلی سلامتی  کی خاطر اپنی جانوں کا نذرانہ پیش کرنے والے پاکستان پولیس کے بہادر جوانوں اور افسران  کو خراج عقیدت پیش کرتے ہیں۔

صدر مملکت نے کہا کہ پاکستان پولیس نے دہشت گردی  کے خلاف جنگ میں ہراول دستے کا کردار ادا کیا، فرض کی ادائیگی کے دوران پاکستان پولیس کے بےشمار جوانوں نے جام شہادت نوش کیا۔

  انہوں نے کہا کہ آج کے دن ہم پولیس کے تمام شہداء کو سلام پیش کرتے ہیں اور  اس عزم کا اظہار کرتے ہیں کہ قوم اپنے ان محسنوں کی لازوال  قربانیوں کو  ہمیشہ یاد رکھے گی۔