ایک رپورٹ کے مطابق انڈونیشیا میں ایک گمشدہ خاتون کی لاش اژدھے کے پیٹ سے برآمد ہوئی۔

برطانوی خبر رساں ادارے کی خبر کے مطابق انڈونیشیا کے صوبہ جامبی میں ایک خاتون کو ایک اژدھے نے ہلاک کر کے پورا نگل لیا۔

کہا جا رہا ہے کہ مبینہ طور پر 50 سالہ خاتون جو ربڑ کے باغات میں کام کرتی تھیں وہ دو روز قبل صبح جب ربڑ کے باغات میں کام کرنے کے لیے نکلی تو شام کو گھر واپس نہیں لوٹی۔

رات دیر گئے تک خاتون کے گھر نہ پہنچنے پر اہل خانہ کو تشویش ہوئی اور لاپتہ خاتون کی گمشدگی کی خبر علاقے میں پھیل گئی، خاتون کو تلاش کرنے والی پارٹیاں اسے تلاش کرنے کے لیے روانہ ہوئیں۔ ایک دن بعد گاؤں والوں کو ایک اژدھا ملا جس کا پیٹ بڑا لگ رہا تھا۔

مقامی لوگوں نے بعد میں اژدھے کو مارا اور اندر سے خاتون کی لاش ملی۔

بیتارا جامبی پولیس کے سربراہ اے کے پی ایس ہریفا نے مقامی میڈیا کو بتایا، مقتولہ سانپ کے پیٹ میں پایا گیا تھا، انہوں نے مزید کہا کہ جب اس کی لاش ملی تو اس کی لاش کافی حد تک برقرار تھی۔

انہوں نے کہا کہ متاثرہ خاتون کے شوہر کو اتوار کی رات اس کے کچھ کپڑے اور اوزار ملے جو اس نے ربڑ کے باغات میں استعمال کیے تھے، جس کی وجہ سے اس نے تلاشی پارٹی کو بلایا۔

برطانوی خبر رساں ادارے نے خبر دی کہ اژدھا جو کم از کم 5 میٹر (16 فٹ) لمبا تھا، کے دیکھے جانے کے بعد، گاؤں والوں نے متاثرہ کی شناخت کی تصدیق کے لیے اسے پکڑ کر مار ڈالا۔

بدقسمت خاتون کے شوہر حریفہ نے ایک نیوز چینل کو بتایا کہ جب انہوں نے اژدھے کے پیٹ کو چیرہ تو انہیں پیٹ کے اندر ایک انسانی چہرہ نظر آیا۔

اگرچہ ایسے واقعات شاذ و نادر ہی ہوتے ہیں لیکن یہ پہلا موقع نہیں جب انڈونیشیا میں کسی کو اژدھے نے مار کر کھایا ہو۔ ملک میں 2017 اور 2018 کے درمیان اسی طرح کی دو اموات رپورٹ ہوئیں۔