سابق وزیراعظم عمران خان این اے 45 کرم کا ضمنی الیکشن لڑسکیں گے یا نہیں سوالات کھڑے ہوگئے۔ 

تفصیلات کے مطابق الیکشن کمیشن کی جانب سے توشہ خانہ ریفرنس کیس میں عمران خان کی قومی اسمبلی کی رکنیت ختم ہونے کے بعد ریجنل الیکشن کمشنر کرم نے الیکشن کمیشن کو خط۔ لکھ دیا۔

ذرائع الیکشن کمیشن کے مطابق ریجنل الیکشن کمشنر کرم نے معاملہ پر الیکشن کمیشن سے قانونی رائے طلب کرلی۔ الیکشن کمیشن عمران خان کے خلاف 21 اکتوبر کو فیصلہ دے چکا۔

خط میں کہا گیا کہ بتایا جائے کیا الیکشن کمیشن فیصلہ کے بعد عمران خان کرم ضمنی الیکشن میں حصہ لے سکتے ہیں یا نہیں۔

ذرائع الیکشن کمیشن کا کہنا ہے کہ الیکشن کمیشن نے مشاورت کے بعد ریجنل الیکشن کمیشن کو قانونی نقطے سے آگاہ کرنے کا فیصلہ کرتے ہوئے الیکشن کمیشن کی قانونی ٹیم کا مشاورتی اجلاس پیر کو طلب کیا ہے۔

ذرائع الیکشن کمیشن کے مطابق قانونی ٹیم آئینی سوالات کے حوالے سے الیکشن کمیشن کو آگاہ کرے گی۔

واضح رہے کہ این اے 45 کرم میں ضمنی انتخابات 30 اکتوبر کو طے شدہ ہیں۔

گذشتہ روز الیکشن کمیشن آف پاکستان کی جانب سے توشہ خانہ ریفرنس میں عمران خان کو نااہل قرار دے دیا گیا۔

چیف الیکشن کمشنر سکندر سلطان راجہ کی سربراہی میں 4 رکنی بینچ نے توشہ خانہ کیس کا فیصلہ پڑھ کرسنایا۔

فیصلے کے مطابق الیکشن کمیشن نے عمران خان کو نا اہل قرار دیتے ہوئے الیکشن کمیشن نے عمران خان کی قومی اسمبلی کی رکنیت ختم کردی ہے۔