آسٹریلیا کی حکومت مشہور ٹینس کھلاڑی نوواک جوکووچ کی ضد کے آگے ڈھیر ہو گئی، سربین اسٹار آسٹریلیا پہنچ گئے۔

تفصیلات کے مطابق نوواک جوکووچ کو تقریباً ایک سال قبل آسٹریلین اوپن میں کھیلے بنا ہی ملک بدر کر دیا گیا تھا، آسٹریلیا پہنچ گئے ہیں، نوواک جوکووچ آسٹریلوی حکام کو کووڈ ویکسینیشن کی دستاویزات دکھانے میں ناکام ہو گئے تھے۔

آسٹریلوی حکام نے تصدیق کی کہ 21 بار کے گرینڈ سلم چمپئین 35 سالہ نوواک جوکووچ جنوری میں آسٹریلین اوپن کھیلنے کے لیے آسٹریلیا پہنچ گئے ہیں۔

نو بار آسٹریلین اوپن جیتنے والے سربیا کے ٹینس اسٹار نوواک جوکووچ پر نومبر میں خود کار طریقے سے تین سالہ ویزا پابندی ختم کر دی گئی تھی۔

یہ بھی پڑھیں: دفاعی چمپئین نوواک جوکووچ آسٹریلین اوپن کے آغاز سے قبل ہی ناک آؤٹ

ٹینس آسٹریلیا کے چیف ایگزیکٹیو کریگ ٹائلی نے کہا کہ مجھے لگتا ہے کہ وہ دوبارہ آسٹریلین اوپن کی جیت کے لیے کافی پر امید ہیں۔

یاد رہے کہ گزشتہ جنوری میں، جب نوواک جوکووچ 2022 کے ٹورنامنٹ کے لیے آسٹریلیا پہنچے تھے تو اس وقت کورونا کے کیسز آسمان کو چھو رہے تھے اور حکومتی قوانین کے مطابق ملک میں داخل ہونے والے کسی بھی شخص کو ویکسین لگوانے کی ضرورت تھی.

نوواک جوکووچ کے پاس ویکسین لگوانے کے کوئی دستاویزی ثبوت نہ ہونے پر آسٹریلوی بارڈر فورس نے ملک میں داخل ہونے پر حراست میں لیا تھا اور امیگریشن ہوٹل میں ٹھہرنے پر مجبور کیا تھا۔

آسٹریلوی بارڈر فورس نے دعویٰ کیا تھا کہ ٹینس اسٹار نے بغیر ویکسین کے اپنے ٹائٹل کا دفاع کرنے کے لیے طبی چھوٹ حاصل کی تھی کیونکہ وہ حال ہی میں کورونا سے صحت یاب ہوا تھا۔

یہ بھی پڑھیں: نوواک جوکووچ آسٹریلیا سے ملک بدری کی جنگ ہار گئے

تاہم 10 دن کی قانونی دلیل کے بعد، حکومت نے فیصلہ دیا کہ اس نے داخلے کے لیے شرائط پوری نہیں کیں اس لیے ان کا ویزا منسوخ کر دیا گیا اور انہیں 2025 تک آسٹریلوی سرزمین پر قدم رکھنے سے منع کر دیا گیا تھا۔

نوواک جوکووچ کی نظر بندی ٹورنامنٹ کی تیاری میں شہ سرخیوں میں چھائی رہی، اس کے ہوٹل کے باہر جمع ہونے والے ہجوم نے جوکووچ کی ملک بدری کے حق میں اور اس کے خلاف مہم چلائی۔

آسٹریلوی امیگریشن کے وزیر اینڈریو جائلز جن کی حکومت مئی میں برسراقتدار آئی تھی نے گزشتہ ماہ نوواک جوکووچ کی پابندی کو ختم کر دیا تھا جس پر جوکووچ نے کہا کہ وہ یہ خبر سن کر بہت خوش ہیں۔

ٹینس آسٹریلیا کے چیف ایگزیکٹیو کریگ ٹائلی نے کہا کہ انہیں کھلاڑی کی واپسی پر ردعمل کی توقع نہیں تھی اور انہوں نے مزید کہا کہ ہم اس کا آسٹریلیا میں واپسی پر خیرمقدم کرتے ہیں۔

چیف ایگزیکٹیو کریگ ٹائلی نے مزید کہا کہ مجھے آسٹریلوی عوام پر بہت زیادہ اعتماد ہے کہ شائقین کس طرح کا رد عمل ظاہر کریں گے.

ٹینس کی عالمی رینکنگ میں پانچویں نمبر پر موجود نوواک جوکووچ نے نومبر میں کہا تھا کہ وہ میلبورن واپس لوٹنے پر راحت محسوس کر رہے ہیں۔

انہوں نے مزید کہا کہ “آسٹریلین اوپن میرا سب سے کامیاب گرینڈ سلم رہا ہے اور میں نے وہاں بہترین کھیل کھیلا ہے۔

نوواک جوکووچ اس وقت رافیل نڈال کے 22 گرینڈ سلم ریکارڈ سے صرف ایک ٹائٹل پیچھے ہیں، سربین ٹینس اسٹار اتوار سے شروع ہونے والے ایڈیلیڈ انٹرنیشنل میں شرکت کریں گے جبکہ آسٹریلین اوپن 16 جنوری کو میلبورن میں شروع ہوگا۔