گورنر پنجاب نے کہا ہے کہ ملک میں ترقی کا سفر نئے عزم اور جذبے سے دوبارہ شروع کرنے کے لیے پرعزم ہیں۔

تفصیلات کے مطابق گورنر پنجاب محمد بلیغ الرحمان سے گورنر ہاؤس لاہور میں وفاقی وزیر خزانہ اسحاق ڈار نے ملاقات کی جس میں ملک کی سیاسی اور معاشی صورتحال سمیت مختلف امور پر تبادلہ خیال کیا گیا۔

اس موقع پر گورنر پنجاب محمد بلیغ الرحمان نے کہا کہ وزیر اعظم پارٹی اور پوری قوم کی نگاہیں آپ پر ہیں، انشا اللہ آپ اور آپ کی تجربہ کار ٹیم جلد ملک کو معاشی مشکلات سے نکالے گی۔

گورنر پنجاب نے کہا کہ آپ اور آپ کی پوری ٹیم کی ملک کو معاشی بحران سے نکالنے کی کوششیں قابل قدر ہیں، ملک میں ترقی کا سفر نئے عزم اور جذبے سے دوبارہ شروع کرنے کے لیے پرعزم ہیں۔

محمد بلیغ الرحمان نے کہا کہ گورنر پنجاب نے کہا کہ وزیر اعظم پاکستان کی قیادت میں پوری وفاقی کابینہ اور حکومت کوشاں ہے تاکہ عوام کو زیادہ سے زیادہ ریلیف دیا جائے۔

گورنر پنجاب محمد بلیغ الرحمان  نے مزید کہا کہ حالات مشکل ضرور ہیں لیکن معیشت کے اشاریوں سمیت دیگر شعبوں میں استحکام آیا ہے۔

ملاقات میں وفاقی وزیر خزانہ اسحاق ڈار نے کہا کہ گزشتہ حکومت کے دور میں ریکارڈ خسارہ اور بھاری قرضوں کی وجہ سے معاشی بحران پیدا ہوا ، مسلم لیگ(ن)نے پہلے بھی ملک کو مشکلات اور بحرانوں سے نکالا ہے۔

وفاقی وزیر خزانہ اسحاق ڈار نے مزید کہا کہ 1999میں ملک کے دفاع کو ناقابل تسخیر بنانے کے لیے ایٹمی دھماکوں کے بعد معاشی پابندیوں کے باوجود اور2013 میں بدترین لوڈ شیڈنگ اور معاشی بحران میں مسلم لیگ(ن)مشکل حالات میں ملک میں استحکام لائی تھی اور اب بھی وہی تجربہ کار ٹیم ملک میں معاشی بحران ختم کر کے معاشی استحکام کے لیے پرعزم ہے۔