چیئر مین پی ٹی آئی عمران خان نے آزاد کشمیر کی پارلیمانی پارٹی کو وزیراعظم آزاد کشمیر سردار تنویر الیاس کی قیادت میں متحد رہنے کی ہدایات جاری کردیں۔

سابق وزیراعظم اور پاکستان تحریک انصاف کے چیئرمین عمران خان نے آزاد کشمیر کی پارلیمانی پارٹی کے اجلاس سے خطاب کرتے ہوئے تمام پارلیمانی پارٹی ارکان کو ہدایت کی کہ وہ وزیر اعظم آزاد کشمیر سردار تنویر الیاس کی قیادت میں متحد رہیں اور آزاد کشمیر میں پی ڈی ایم کا بھر پور مقابلہ کیا جائے ۔

انہوں نے کہا کہ پارٹی کا پیغام گھر گھر پہنچایا جائے اور آپس میں اتحاد واتفاق رکھا جائے، کچھ وقت تک مشکلات ضرور ہیں لیکن جلد سرخرو ہوں گے۔

اس موقع پر وزیر اعظم آزاد کشمیر سردار تنویر الیاس نے پوری پارلیمانی کی جانب سے چیئر مین کاشکریہ ادا کیا اور ان پر بھر پور اعتماد کا اظہار کرتے ہوئے کہا کہ پی ٹی آئی آزاد کشمیر اپنے چیئر مین کی ہر آواز پر لبیک کہے گی اور پارٹی پالیسی پر کاربند رہے گی۔

یہ بھی پڑھیں: آزاد کشمیر بلدیاتی انتخابات میں کامیابی پر عمران خان کی مبارکباد

قبل ازیں عمران خان نے وزیراعظم آ زاد کشمیر سردار تنویر الیاس کو ارکان اسمبلی کے گلے شکوے دور کرنے کی ہدایت بھی کی۔

اس موقع پر آزاد کشمیر کی تمام پارلیمانی پارٹی وزیر اعظم سردار تنویر الیاس کی قیادت میں گئی تھی جن میں سابق وزیر اعظم سردار عبدالقیوم نیازی، اسپیکر چوہدری انوارالحق ، خواجہ فاروق احمد ،چوہدری رشید ، دیوان چغتائی ،سردار میر اکبر،فہیم ربانی ، سردار محمد حسین ،چوہدری محمد اخلاق ،چوہدری رفیق نیئر ، چوہدری ارشد ، چوہدری یاسر سلطان، چوہدری اظہر صادق ، علی شان سونی،چوہدری مقبول ، حافظ حامد رضا،محمد حسین سرگالہ ،جاوید بٹ ،تقدیس گیلانی، صبیحہ صدیق ،بیگم امتیازنسیم،ڈپٹی سپیکر چوہدری ریاض گجر،ماجد خان،اکبر ابراہیم ،دیوان محی الدین،عاصم شریف بٹ ودیگر موجود تھے ۔