گلشن اقبال کے ڈی اے مارکیٹ کے قریب ہوٹل پر بیٹھے 20 افراد کو ڈاکوؤں نے سرعام لوٹ لیا۔

تفصیلات کے مطابق کراچی کے علاقے گلشن اقبال کے پولیس اسٹیشن کے قریب واقع کے ڈی اے مارکیٹ میں ڈاکؤوں نے ہوٹل پر بیٹھے چائے پینے والوں سے سرعام لوٹ مار کی اور یہ تمام منظر سی سی ٹی وی فوٹیج میں محفوظ ہوگیا۔

سی سی ٹی وی فوٹیج میں دیکھا جاسکتا ہے کہ تین ڈاکو چائے کے ہوٹل پر پہنچے ، ایسے میں ایک کے ہاتھ میں کلاشنکوف موجود تھی اور اس نے اسلحہ کے زور پر وہاں بیٹھے 20 سے زائد شہریوں کو لوٹ لیا اور کوئی بھی شہری مزاحمت نہ کرسکا۔

یہ بھی پڑھیں؛ کراچی میں فائرنگ کے 2 مختلف واقعات

واقعے کے  بعد متاثرہ افراد نے گلشن اقبال تھانے کے باہر احتجاج کیا لیکن پولیس ڈاکؤوں کو تلاش کرنے کے بجائے ہوٹل ہی بند کردیا۔

متاثرہ شہری کا کہنا تھا کہ ہم جیب میں گٹکا یا میم پوری بھی رکھ کرجائیں تو پولیس کو خبر ہوجاتی ہے لیکن شہر بھر میں منشیات کھلے عام فروخت کی جا رہی ہے اور یہ ڈاکوؤں بھی دندناتے پھر رہے ہیں، لیکن پولیس خاموش تماشائی بنی ہوئی ہے۔

واضح رہے کہ کراچی میں اسٹریٹ کرائمز میں دن بدن اضافہ ہوتا جارہا ہے اور ایسے میں سندھ سرکار اور کراچی پولیس صرف بیانات تک ہی محدود ہے۔