مونس الہٰی نے عمران خان کو یقین دہانی کرواتے ہوئے کہا کہ آپ جب کہیں گے اسمبلیاں توڑ دیں گے۔

 تفصیلات کےمطابق پاکستان مسلم لیگ (ق) کے رہنما مونس الہٰی کی زمان پارک میں عمران خان سے ملاقات ہوئی جس میں مونس الہٰی نے اہم معاملات پر عمران خان سے مشاورت کی۔

مونس الہٰی اور عمران خان کے درمیان ہونے والی ملاقات میں آئندہ اتحادی سیاست کے حوالے سے تبادلہ خیال کیا گیا۔

پاکستان مسلم لیگ (ق) کے رہنما مونس الہٰی نے عمران خان سے گفتگو کرتے ہوئے کہا کہ پنجاب اسمبلی تحلیل کے بعد انتخابات میں کتنی سیٹوں پر ق لیگ انتخاب لڑے گی، آپ جب کہیں گے اسمبلیاں توڑ دیں گے۔

ذرائع کے مطابق چوہدری پرویز الہٰی نے ایک مرتبہ پھر عمران خان پر بھر پور اعتماد کا اظہار کردیا، آئندہ اتحادی سیاست کے حوالے سے اہم معاملات پر ایک مزید ملاقات ہوگی۔

واضح رہے کہ پاکستان مسلم لیگ (ق) کے رہنما مونس الہٰی نے گزشتہ رات بھی عمران خان سے ملاقات کی تھی۔

17 دسمبر کو اسمبلی تحلیل کرنے کا اعلان کروں گا، عمران خان

خیال رہے کہ پی ٹی آئی کی اتحادی جماعت مسلم لیگ ق نے عمران خان کو پہلے ہی اپنی مکمل حمایت کی یقین دہائی کر رکھی ہے۔

پی ٹی آئی قیادت کی اہم مشاورت

اس سے قبل پنجاب اور خیبرپختونخوا اسمبلیوں کی تحلیل کا معاملے میں چئیرمن تحریک انصاف عمران خان کی زیر قیادت پی ٹی آئی کے بڑوں نے سر جوڑ لیے۔

سینئر رہنماؤں کے مشاورتی اجلاس میں شاہ محمود قریشی، اسد عمر، شوکت ترین، پرویز خٹک، بابر اعوان، شیریں مزاری، اعجاز چوہدری، زرتاج گل، حماد اظہر، شفقت محمود، میجر طاہر صادق، میاں محمود الرشید، جمشید اقبال چیمہ شامل تھے۔

اس کے علاوہ زلفی بخاری، فواد چوہدری، ڈاکٹر یاسمین راشد، عثمان بزدار،اسپیکر پنجاب اسمبلی سبطین خان، میاں اسلم اقبال اور سینٹ میں قائد حزب اختلاف وسیم شہزاد بھی موجود ہیں۔

آپ کو اختیار دیا ہے جو بھی فیصلہ کریں گے فوری عمل ہوگا، مونس الہیٰ کی عمران خان کو یقین دہانی

اجلاس میں اس معاملے پر غور کیا جائے گا کہ آیا دونوں اسمبلیاں بیک وقت تحلیل ہوں گی یا پہلے صرف پنجاب اسمبلی؟ سابق وزیراعظم عمران خان  پنجاب اور خیبرپختونخوا کی صوبائی اسمبلیاں کب تحلیل کی جائیں اجلاس میں سینئر قیادت سے رائے طلب کریں گے۔

یاد رہے کہ پی ٹی آئی کے چئیرمن عمران خان تمام ڈویژن کے ارکان قومی و صوبائی اسمبلی سے مشاورت مکمل کر چکے ہیں اور ارکان اسمبلی کی اکثریت نے اسمبلی تحلیل کرنے کی مکمل توثیق کر دی ہے۔

کچھ ارکان اسمبلی کا تحفظات کا اظہار

پاکستان تحریک انصاف کے چیئرمین عمران خان کی زیر صدارت ڈیرہ غازی خان اور رحیم یار خان کے ارکان قومی وصوبائی اسمبلی کے ارکان کا اجلاس ہوا۔

ذرائع نے بتایا ہے کہ کچھ ارکان اسمبلی نے اسمبلیوں کی تحلیل کے حوالے سے تحفظات کا اظہار کرتے ہوئے کہا کہ اسمبلی تحلیل ہونے کی صورت میں وفاقی حکومت انتخابی عمل کو التواء کا شکار کرسکتی ہے اور الیکشن کمیشن وفاقی حکومت کی ایماء پر کام کر رہا ہے۔