ممنوعہ فنڈنگ کیس میں عدالت نے سابق وزیراعظم عمران خان کی عبوری ضمانت میں 10 فروری تک توسیع کر دی۔

تفصیلات کے مطابق بنکنگ کورٹ اسلام آباد میں چیئرمین تحریکِ انصاف عمران خان کیخلاف فارن ایکسچینج ایکٹ کے تحت ممنوعہ فنڈنگ کیس کی سماعت ہوئی۔

عدالت سماعت کرتے ہوئے کہا کہ دس فروری کو عمران خان نہ آئے تو ضمانت خارج کر دیں گے۔ دس فروری کو نئی کوئی درخواست بھی لانے کی کوشش کی تو ضمانت خارج ہوگی۔

بنکنگ عدالت نے عمران خان کی ویڈیو لنک پر حاضری لگوانے کی درخواست مسترد کردی۔

عمران خان نے آج کی سماعت کیلئے طبی بنیادوں پرحاضری سے استثنیٰ کی درخواست دائر کر رکھی تھی۔ بنکنگ کورٹ کی جج رخشندہ شاہین کی عدالت میں کیس آج سماعت کیلئے مقررتھا۔

عمران خان کی جانب سے درخواست میں استدعا کی گئی کہ عدالت حاضری سے استثنیٰ کی درخواست منظور کرے اوروڈیو لنک کے ذریعے حاضری لگانے کی اجازت دی جائے۔

درخواست کے ہمراہ عمران خان کی میڈیکل رپورٹ بھی منسلک کی گئی۔ عمران خان ایف آئی اے کے سامنے شامل تفتیش نہ ہوئے، انھوں نے وکلا کے ذریعے ایف آئی اے کو درخواست بھیج دی جس میں کہا گیا کہ ایف آئی آر میں لگائے گئے الزامات بوگس ہیں۔

درخواست میں یہ بھی کہا گیا کہ وزیرآباد میں حملے کے بعد نقل و حرکت محدود کر رکھی ہے۔ کسی باضابطہ انکوائری کے بغیر ایف آئی آر درج کی گئی۔ 2013 کی ٹرانزیکشنز پرانا معاملہ ہے، بنکوں سے ریکارڈ کیلئے وقت چائیے۔ بارہا درخواست کی جا چکی ہے تفتیشی ٹیم زمان پارک آجائے۔

درخواست میں یہ بھی کہا گیا کہ زخمی ہونے کے باعث نقل و حرکت محدود کی ہوئی ہے۔ ایف آئی اے ان حالات کو مدنظر رکھے،۔

عدالت نے 31 جنوری تک عمران خان کو شامل تفتیش ہونے کی ہدایت کی تھی، درخواست وکیل نعیم حیدر پنجوتھہ نے دائر کی۔