ایف آئی اے عدالت نے منی لانڈرنگ کیس میں وزیراعظم شہبازشریف کے بیٹے سلیمان شہباز کو بے گناہ قرار دے دیا۔

تفصیلات کے مطابق ایف آئی اے کورٹ لاہور میں منی لانڈرنگ کیس میں وزیراعظم کے صاحبزادے کی ضمانت قبل از گرفتاری  کی درخواست پر سماعت ہوئی۔

دوران سماعت ایف آئی اے کی عدالت نے وزیراعظم شہبازشریف کے صاحبزادے سلیمان شہباز کو بے گناہ قرار دے دیا۔

اسپیشل جج سنٹرل بخت فخر بہزاد نے سلیمان شہباز کی درخواست پرسماعت کی۔ اسپیشل پراسیکیوٹر فاروق باجوہ اورتفتیشی افسر ضمنی چالان سمیت پیش۔

فاضل جج نے سماعت کے دوران استفسار کیا کہ چالان کے ساتھ لف ریکارڈ کہاں ہے؟ جس پر تفتیشی افسر نے جواب دیا کہ چالان کو باقاعدہ اتھارٹی سے منظوری کے بعد پیش کردیں گے۔

اسپیشل جج سنٹرل بخت فخر بہزاد نے کہا کہ آپ سے چالان پڑھنے کیلئے لیا ہے، واپس کر دیں گے۔

امجد پرویز ایڈووکیٹ نے مؤقف پیش کیا کہ چالان میں سلیمان شہباز کو بے گناہ قرار دے دیا ہے، سلیمان شہباز اور طاہر نقوی کی درخواستیں واپس لینا چاہتے ہیں۔

ضمنی چالان میں کہا گیا کہ سلیمان شہباز کیس میں ملوث نہیں پائے گئے، اشتہاری سید طاہر نقوی بھی بے گناہ پائے گئے ہیں جس کے بعد عدالت نے سلیمان شہبازکی ضمانت قبل از گرفتاری درخواست واپس لینے کی بنیاد پر خارج کر دی۔

ایف آئی اے نے عدالت میں بیان دیا کہ سلیمان شہباز کے خلاف منی لانڈرنگ کے ثبوت نہیں ملے۔ کسی قسم کے کک بیکس کے ثبوت بھی نہیں ملے۔ سلیمان شہباز اور طاہر نقوی کے کیس میں ملوث ہونے کے ثبوت نہیں ملے۔