نئے سال کے آغاز کے ساتھ ہی یورپی یونین نے کروشیا کو بھی گود لے لیا ہے، کروشیا اب یورپی یونین کا مکمل حصہ بن چکا ہے۔

تفصیلات کے مطابق سال 2022 کی آخری رات جب ساری دنیا نئے سال کا جشن منا رہی تھیں اس وقت کروشیا کی بلقان قوم نے اپنی کرنسی ’کونا‘ کو خیرباد کہتے ہوئے یورو کو اپنانے کا فیصلہ کیا۔

غیر ملکی میڈیا کی خبروں کے مطابق اب کروشیا یورپ کے پاسپورٹ فری شینگن زون میں داخل ہو چکا ہے، اور بارڈر لیس یورپ کلب کا باضابطہ ممبر بن گیا ہے۔

کروشیا اپنی کرنسی کو خیر باد کر کے یورو کرنسی اپنانے والا 20 واں ملک بن گیا ہے۔

جبکہ شینگن زون میں کروشیا 27 واں ملک ہے جس کے رہائشی دنیا کے سب سے بڑا پاسپورٹ فری سفری علاقے میں نقل و حرکت کر سکتے ہیں۔

واضح رہے کہ یورپی یونین میں شامل تمام ممالک کی سرحدیں ایک دوسرے کے شہریوں کے لیے کھلی ہوئی ہیں اور یورپی یونین کے 400 ملین سے زیادہ لوگوں کو یہ سہولت حاصل ہے۔

کروشیا کی یورپی یونین میں شمولیت کے اعلان کے موقع پر یورپی یونین کی سربراہ ارسولا وان ڈیر لیین بھی موجود تھیں۔

یورپی یونین کی سربراہ نے اس موقع پر ٹوئٹ کیا کہ یہ نئی شروعات کا موسم ہے اور یورپ میں ایسی کوئی جگہ نہیں ہے جہاں یہ کروشیا سے زیادہ سچ ہو۔

ارسولا وان ڈیر لیین نے یورپی یونین کے رکن سلووینیا کے ساتھ سرحدی کراسنگ پر کروشین وزیر اعظم آندریج پلینکووچ اور سلووینیائی صدر نتاسا پیرک موسر سے ملاقات کی۔

کروشیا نے 1990 میں سابق یوگوسلاویہ سے آزادی کی جنگ لڑ کر اپنی خودمختاری حاصل کی تھی، کروشیا کی آبادی 3.9 ملین ہے، کروشیا 2013 میں یورپی یونین میں شامل ہوا تھا۔