سعودی عرب کے فٹ بال کلب النصر اور الہلال کے مابین ہونے والے دوستانہ میچ کی ٹکٹ دو ملین ڈالرز سے زائد رقم میں فروخت ہوئی۔

غیر ملکی میڈیا کی خبروں کے مطابق ایک سعودی ٹیک کمپنی ’ایزون‘ نے ریاض سیزن کپ میں سعودی عرب کے النصر اور الہلال فٹ بال کلب کے دوستانہ میچ کی ٹکٹ پر بولی لگائی۔

النصر اور الہلال فٹ بال کلب کے اس دوستانہ میچ میں لیونل میسی اور کرسٹیانو رونالڈو شرکت کریں۔ کرسٹیانو رونالڈو اپنے کلب النصر فٹ بال کلب سے کھیلیں گے۔

اس میچ کو دیکھنے کے لیے ویسے تو شائقین روایتی طور پر ٹکٹ خرید کر میچ دیکھ سکیں گے، لیکن اس میچ کا ایک ٹکٹ منتظمین نے نیلامی کے لیے پیش کیا جسے ’گولڈن ٹکٹ‘ کا نام دیا گیا۔

یہ گولڈن ٹکٹ 2.5 ملین ڈالرز میں محمد المنجم نامی ایک سعودی شہری نے حاصل کر لیا ہے جس کی پاکستانی روپوں میں مالیت تقریباً 59 کروڑ روپے بنتی ہے۔

گولڈن ٹکٹ کے مالک کو نہ صرف رونالڈو اور میسی کے علاوہ کائلان ایمباپے اور نیمار جیسے کھلاڑیوں کے کھیل سے لطف اندوز ہونے کا موقع ملے گا، بلکہ اسے دیگر خصوصی سہولیات بھی دی جائیں گی جو دیگر تماشائیوں کو حاصل نہیں ہوں گی۔

گولڈن ٹکٹ کے مالک کو میچ کے بعد تقریب تقسیم انعامات میں بھی مدعو کیا جائے گا، اسے دونوں کلب کے دڑیسنگ روم کا دورہ بھی کرایا جائے گا اور اسے کھلاڑیوں کے ساتھ سیلفی لینے کی بھی اجازت ہو گی۔

گولڈن ٹکٹ کا مالک میچ جیتنے والی ٹیم کے ساتھ وکٹری اسٹینڈ پر بھی کھڑا ہو گا، اور اسے دونوں ٹیموں کو دیئے جانے والے گالہ لنچ میں بھی شرکت کا موقع ملے گا۔

ایک ویڈیو بھی پوسٹ کی گئی جس میں اس بات کی تفصیلات بتائی گئی ہیں کہ بیونڈ امیجنیشن ٹکٹ کے لیے جیتنے والے کو ان کے پیسوں میں کیا ملے گا۔ منگل کی آدھی رات تک 79 سیکنڈ کے اس کلپ کو 3.6 ملین سے زیادہ بار دیکھا جا چکا ہے۔

ریاض کے کنگ فہد فٹ بال اسٹیڈیم میں ہونے والے اس میچ کے منتظمین کا کہنا ہے کہ گولڈن ٹکٹ سے حاصل ہونے والی رقم آمدنی نیشنل پلیٹ فارم فار چیریٹیبل ورک، جسے احسان بھی کہا جاتا ہے کو عطیہ کر دی جائے گی۔