سابق وزیراعظم عمران خان کی پیشی کے معاملے پراُن کی گاڑی کو لاہورہائی کورٹ کے احاطے میں داخلے کی اجازت مسترد کر دی گئی۔

تفصیلات کے مطابق لاہور ہائی کورٹ میں سربراہ تحریکِ انصاف عمران خان کی پیشی کے موقع پرسیکیورٹی کےغیر معمولی اقدامات کیے گئے ہیں۔ پولیس کی بھاری نفری عدالت کے اندر اور باہر تعینات کیے گئے ہیں۔

عدالتی عملے، سائلین اور وکلاء کےعلاوہ کسی کو بھی عدالتی احاطے میں آنے کی اجازت نہیں دی جارہی۔ ہائی کورٹ آنے والوں کوسخت چیکنگ کے بعد اندرآنے کی اجازت دی جارہی ہے۔

ادھرعدالت میں پیشی کے معاملے پرلیگل ٹیم عمران خان سے دوبارہ مشاورت کرے گی۔ دستخط میں فرق کے معاملے میں عمران خان کو آج لاہور ہائی کورٹ نے طلب کررکھا ہے۔

عمران خان کو عدالت نے آج دو بجےپیش ہونے کاحکم دیا ہے۔ عدالت نے بیان حلفی پردستخط میں فرق پرعمران خان کو وضاحت کےلئے طلب کررکھا ہے۔

جسٹس طارق سلیم شیخ کیس کی سماعت کریں گے جبکہ عمران خان کےوکلا خواجہ طارق رحیم، اظہرصدیق اور غلام عباس نسوانہ دلائل دیں گے۔

عمران خان نے بینکنگ کیس میں حفاظتی ضمانت کے لیے لاہور ہائی کورٹ سے رجوع کیاتھا۔ بنکنگ مقدمے میں عمران خان کواسلام آباد ہائی کورٹ سے ریلیف مل چکا ہے۔

عمران خان کے وکلا نے ریلیف کی بنا پرلاہورہائی کورٹ سے درخواست واپس لینے کی استدعا کی تھی۔

دوسری جانب زمان پارک لاہورمیں پی ٹی آئی کے کارکنان عمران خان کی عدالت میں ممکنہ پیشی کے معاملے میں بڑی تعداد میں موجود ہیں۔