سابق وزیراعظم عمران خان نے پہلی انتخابی ریلی کے لیے اپنے پیغام میں کہا کہ کل 12 مارچ دوپہر 2 بجے میں خود نکلوں گا اور الیکشن ریلی کی قیادت کروں گا، ہم سب نے نکلنا ہے اور پیغام دینا ہے کہ ہم جبر کے سامنے سرنڈر نہیں کریں گے۔ 

پاکستان تحریک انصاف کے چیئرمین عمران خان نے عوام سے خطاب کرتے ہوئے کہا کہ ہمارے کارکن کو قتل کیا گیا، میرے اوپر مقدمہ درج کیا گیا اور اب سارے ثبوت ختم کرنے کی کوشش کی جا رہی ہے۔

عمران خان نے کہا کہ آئی جی کو شرم آنی چاہیے کہ جو اپنا بیان بدل رہے ہیں، آج پریس کانفرنس میں کہاگیاکہ ظل شاہ حادثے میں جاں بحق ہوا ، آئی جی لوگوں کو پکڑ رہا ہے تاکہ گواہ بناکر بیان لے، یہ ہی ان لوگوں نے شہباز گل کے ساتھ کیا۔

انہوں نے کہا کہ ملک میں قانون کی حکمرانی نہیں ہے، اعظم سواتی کہتے رہے مجھ پر تشدد ہوا، یہاں تو نامعلوم افراد فیصلہ کرتے ہیں کہ تشدد ہواکہ نہیں۔

عمران خان کا کہنا تھا کہ مریم نواز عدالت کو حکم کررہی ہیں کہ اسکو جیل میں ڈالو، یہ مہارانی ،شہزادے اور بادشاہ عدلیہ کو حکم کررہےہیں، یہ لوگ بنانا ری پبلک بنارہےہیں ، حکم کررہی ہے کہ جیل میں ڈالواور کیسز معاف کرو۔

انہوں نے کہا کہ ظل شاہ کے قتل کا مجھے آج پتا چلتا ہے کہ حادثہ ہے، تحریک انصاف کے کارکنوں کو تشدد کا نشانہ بنایاجارہا ہے، 25 مئی کو بھی ہمارے کارکنوں پر تشدد کیا گیا اور اس دن بھی انہوں نے ظل شاہ کا بازو توڑ دیا تھا، ہمارے ایک کارکن کو راوی پل سے نیچے پھینکا گیا، 11 سال کے بچے کو بھی گرفتار کرکے جیل میں ڈالاگیا۔

چیئرمین پی ٹی آئی نے کہا کہ کچھ لوگوں کی وجہ سے پولیس بدنام ہوتی ہے، یہ لوگوں کو انسان نہیں سمجھتے بھیڑ بکریاں سمجھتے ہیں، ظل شاہ کے قتل کا الزام مجھ پر ڈال دیا۔

انہوں نے مزید کہا کہ لوگ میری گرفتاری کے ڈر سے شدید سردی میں کیمپ میں رہتےتھے، کارکنوں کو خدشہ تھا کہ مجھے اغواکرلیاجائیگا، کارکنان نے اعظم سواتی کا واقعہ اپنی آنکھوں سے دیکھاتھا، کارکنوں کا ساتھ دینے پر شکریہ اداکرتاہوں۔