وزیر اعلیٰ بلوچستان عبدالقدوس بزنجو نے کہا ہے کہ بلوچستان میں وسائل کی کمی ہے۔

تفصیلات کے مطابق وزیر اعلیٰ بلوچستان عبدالقدوس بزنجو نے صحافیوں سے گفتگو کرتے ہوئے کہا کہ صوبے کے بجٹ کا 25 فیصد صرف گوادر کی ڈویلپمنٹ پر خرچ کر رہے ہیں، گوادر کے لوگوں نے پورٹ اور دیگر میگا منصوبوں کیلئے اپنی قیمتی زمینوں کی قربانی دی ہے۔

  انہوں نے کہا کہ بلوچستان میں وسائل کی کمی ہے، گوادر کے منصوبوں کیلئے دنیا کے بہترین کنسلٹینٹس ہائر کئے ہیں، این ایف سی ایوارڈ میں ہمیں شیئر آبادی کے حساب سے ملتا ہے جوکہ بہت کم ہے۔

وزیر اعلیٰ بلوچستان نے یہ بھی کہا کہ ہم اس قابل نہیں کہ صوبے کے تمام مسائل حل کر سکیں لیکن پھر بھی نا امید نہیں ہیں، قدرتی معدنیات سے صوبے کو اچھی خاصی رائلٹی ملنا شروع ہوچکی ہے۔

عبدالقدوس بزنجو نے یہ بھی کہا کہ ریکوڈک منصوبے میں ہماری کوششوں سے صوبے کو 5 فیصد رائلٹی مل رہی ہے جوکہ سالانہ ڈھائی سے تین ارب روپے بنتی ہے، سیندک پروجکٹ میں بھی ہماری جدوجہد سے رائلٹی بڑھا دی گئی ہے۔

وزیر اعلیٰ بلوچستان عبدالقدوس بزنجو نے مزید کہا کہ پورٹ کو بجلی کی فراہمی اور روڈ اسٹریکچر کو بہتر بنانے کیلیئے تیزی سے کام جاری ہے، منرلز کے شیئرز کا ہمیں ڈھائی ارب روپے کا پہلا چیک بھی مل گیا ہے، امید ہے کہ مستقل میں بلوچستان حکومت کو معاشی مشکلات در پیش نہیں آئیں گی۔