کراچی میں وزیراعظم شہبازشریف اور ترکی کے نائب صدرجودت یلماز نے پی این ایس طارق لانچ کردیا۔

تفصیلات کے مطابق کراچی میں پاک بحریہ کے جنگی جہاز پی این ایس طارق کی لانچنگ کی تقریب منعقد ہوئی۔ وزیراعظم شہباز شریف، ترکیہ کے نائب صدرجودت یلماز، وفاقی وزیرخارجہ بلاول بھٹو سمیت وفاقی وزرا شریک ہوئے۔

تقریب میں نیول چیف ایڈمرل امجد علی خان نیازی، گورنرسندھ کامران ٹیسوری اوروزیراعلٰی سندھ سید مراد علی شاہ بھی شریک تھے۔ نیول چیف اور ترکی کے نائب صدر جودت یلمازنے تقریب سے خطاب بھی کیا۔ وزیراعظم شہبازشریف کو جہاز کی تیاری سے متعلق بریفنگ بھی دی گئی۔

ملجم کلاس جہاز کثیر المقاصد جنگی بحری جہاز ہے جو سطح آب، زیر آب اور فضائی آپریشن کی جدید حربی صلاحیت رکھتا ہے۔ یہ بحری جہاز سطح آب سے میزائلوں اور مین گن سے اہداف کا پتہ لگا کر حملے کی صلاحیت رکھتا ہے۔

جہاز جدید ترین سینسر، جارحانہ اور دفاعی ہتھیار سے لیس ہے۔ جدید بحری جہاز ہیلی کاپٹر کے ذریعے آپریشنز کرنے کی صلاحیت اور کیم کاپٹر سے بھی لیس ہے۔

پاک بحریہ کےچار ملجم کلاس جہازوں کی تعمیر کا معاہدہ ستمبر 2018 میں طے پایا، معاہدے کے تحت دو جہاز ترکیہ اور دو پاکستان میں تیار کیے جا رہے ہیں، تین جہازوں کی لانچنگ ہوچکی ہے اور یہ جہاز تکمیل کے مختلف مراحل میں ہیں۔

پی این ایس طارق ترکیہ کے تعاون سے کراچی شپ یارڈ میں تیار کیا گیا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/latest/2023/08/653399/amp/ کو لائک کریں