وزیرخارجہ بلاول بھٹو کی زیرِ صدارت پاکستان کرکٹ ٹیم کےدورہ بھارت سے متعلق اعلی سطح خصوصی کمیٹی کا اجلاس کل ہوگا۔

ذرائع کےمطابق بین الاقوامی کرکٹ کونسل عالمی کپ 2023ء میں پاکستان کرکٹ ٹیم کے دورہ بھارت کے معاملے پر وزیر خارجہ بلاول بھٹو کی زیر صدارت اعلی سطح خصوصی کمیٹی کا اجلاس کل وزارت خارجہ میں ہوگا۔

ذرائع کا کہنا ہے کہ اجلاس میں پاکستان کرکٹ بورڈ کے چیئرمین ذکاء اشرف کمیٹی کو عالمی کپ سمیت تمام امور پر بریفنگ دیں گے، اجلاس میں وزارت خارجہ، داخلہ، بین الصوبائی رابطہ، قانون، اطلاعات، مواصلات، سیکیورٹی حکام شرکت کریں گے۔

ذرائع کے مطابق کمیٹی اجلاس میں کرکٹ ٹیم کو بھارت بھیجنے کی اجازت دینے کے لیے سیکیورٹی امور کا جائزہ لیا جائے گا، کمیٹی پاکستان کرکٹ ٹیم کے ممکنہ دورہ سے قبل نمائندہ سیکیورٹی وفد بھارت بھیجنےپربھی غورکرے گی۔

ذرائع نے یہ بھی بتایا کہ چنائے، بنگلورو، حیدرآباد، کولکتہ، احمد آباد میں شیڈول میچز اور وہاں کی سیکیورٹی صورتحال کا جائزہ لیا جائے گا، پاکستان کرکٹ بورڈ نے وزیراعظم کو خط ارسال کرکے ٹیم کو بھارت بھیجنے یا نہ بھیجنے بارے رائے مانگی تھی۔

وزیراعظم محمد شہباز شریف نے وزیر خارجہ بلاول بھٹو کی سربراہی میں غور کے لیے اعلیٰ سطح کی کمیٹی قائم کی تھی۔ پاکستان کرکٹ ٹیم کو6 اکتوبر سے 12 نومبر تک بھارت میں عالمی کپ کے 9 میچز کھیلنا ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/latest/2023/08/937252/amp/ کو لائک کریں