عراق کے شہر کربلا جانے والی بس شاہراہ پر حادثے کا شکار ہو گئی جس کے نتیجے میں 16 زائرین جاں بحق ہو گئے ہیں۔

تفصیلات کے مطابق حضرت امام حسین کی شہادت کے چہلم کے موقع پر کربلا جانے والی ایک بس حادثے کا شکار ہو گئی ہے جس کے نتیجے میں 16 زائرئن جاں بحق ہو گئے ہیں۔

سرکاری خبر رساں ادارے کی خبر کے مطابق شمالی عراق میں ایک سڑک حادثے میں کم از کم 16 افراد ہلاک ہو گئے ہیں، جن میں زیادہ تر شیعہ ایرانی زائرین ہیں، جب کہ لاکھوں افراد دنیا کے سب سے بڑے مذہبی اجتماعات میں سے ایک اربعین کے لیے کربلا کے مقدس شہر میں جمع ہو رہے ہیں۔

سرکاری خبر رساں ادارے نے صوبہ صلاح الدین کے ڈائریکٹر ہیلتھ سروسز خالد برہان کے حوالے سے بتایا ہے کہ دوجیل اور سامرا شہروں کے درمیان ہونے والے اس حادثے میں کم از کم 13 افراد زخمی بھی ہوئے ہیں۔

برہان نے حادثے کی وجوہات کی تفصیل نہیں بتائی لیکن کہا کہ ہلاک ہونے والوں میں زیادہ تر کا تعلق ایران سے تھا۔ انہوں نے مزید کہا کہ زخمیوں کو اسپتال لے جایا گیا ہے۔

صلاح الدین کے ایک طبی اہلکار نے نام ظاہر نہ کرنے کی شرط پر خبر رساں ادارے اے ایف پی کو بتایا کہ جمعے کی نصف شب سے کچھ دیر قبل دو منی بسیں آپس میں ٹکرا گئیں۔

عہدیدار نے عینی شاہدین کا حوالہ دیتے ہوئے بتایا کہ خیال کیا جاتا ہے کہ ڈرائیوروں میں سے ایک سو گیا تھا۔ انہوں نے مرنے والوں کی تعداد 18 بتائی ہے۔

وزارت داخلہ کی جانب سے جمعے کے روز جاری کردہ اعداد و شمار کے مطابق اس سال اربعین کے آغاز کے بعد سے 2.6 ملین زائرین، جن میں سے زیادہ تر ایران سے ہیں، سڑک یا ہوائی راستے سے عراق میں داخل ہوئے۔

یہ اجتماع پیغمبر اسلام کے نواسے امام حسین کی شہادت پر 40 روزہ سوگ کی مدت کے اختتام کی علامت ہے۔ اس سال یہ 6 اور 7 ستمبر کو اختتام پذیر ہوگا۔

حالات حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/latest/2023/09/772724/amp/ کو لائک کریں