نئے سال کی آمد پر 31 دسمبر کی رات کو برج خلیفہ کی آتش بازی دیکھنے کے لیے ہوٹلز کا ایک رات کا کرایہ 80 ہزار درہم تک پہنچ گیا ہے۔

عرب میڈیا کی رپورٹس کے مطابق دبئی میں برج خلیفہ پر سال نو کی آتش بازی کا دلکش نظارہ دیکھنے کے خواہش مند افراد کو 80 ہزار درہم (6186774 پاکستانی روپے) خرچ کرنا پڑیں گے۔

رپورٹس کے مطابق ڈاون ٹاؤن اور برج خلیفہ کے آس پاس کے اپارٹمنٹس مکمل طور پر بک ہو چکے ہیں۔

دبئی کے رئیل اسٹیٹ ایجنٹوں کی جانب سے لگژری دو بیڈروم والے اپارٹمنٹس پیش کیے جا رہے ہیں، جہاں سے برج خلیفہ آتش بازی کا شاندار نظارہ دیکھا جا سکتا ہے۔

رئیل اسٹیٹ ایجنٹس کا کہنا ہے کہ اپارٹمنٹس کا کرایہ 12 ہزار درہم فی رات سے شروع ہو کر 37 ہزار درہم فی رات تک پہنچ سکتا ہے۔

عرب میڈیا کے مطابق ایک آن لائن ہوٹل بکنگ کی ویب سائٹ پر خصوصی پینٹ ہاوسز کا ایک رات کا کرایہ 70 ہزار درہم سے 80 ہزار درہم تک بتایا گیا ہے۔

ویب سائٹ پر اضافی فہرستوں میں پریمیم اپارٹمنٹس ہیں جو 30 دسمبر 2023 سے یکم جنوری 2024 کے درمیان 30،000 درہم سے 50،000 درہم کے نرخوں پر کرایہ پر دستیاب ہیں۔

قلیل مدتی رہائش کی ایپس بھی نئے سال کی شام منانے کے خواہشمند افراد کی طرف سے نمایاں دلچسپی دیکھ رہی ہیں، ان ایپس کا کہنا ہے کہ زیادہ تر کمرے پہلے ہی بک ہوچکے ہیں۔

کرائے پر فلیٹس اور کمرے دینے والی کمپنی کے سی ای او ونائک مہتانی نے عرب میڈیا کو بتایا کہ ہمارے ڈاؤن ٹاؤن کی قیمتیں پچھلے سال کے مقابلے میں تقریبا 20 تا 30 فی صد زیادہ ہیں۔

ونائک مہتانی نے کہا کہ ہمارے پاس چار بیڈروم کا پینٹ ہاؤس ہے جو 31 ویں رات کے لئے 37،000 درہم میں دستیاب ہے جو آپ کو آتش بازی کا واضح نظارہ فراہم کرے گا۔