لکی مروت میں دہشتگردوں سے جھڑپ میں پاک فوج کے 2 جوان شہید جبکہ 2 دہشتگرد ہلاک ہو گئے۔

پاک فوج کے شعبہ تعلقات عامہ (آئی ایس پی آر) کے مطابق ضلع لکی مروت میں دہشت گردوں اور سیکیورٹی فورسز کے درمیان شدید فائرنگ کا تبادلہ ہوا جس کے دوران سیکیورٹی اہلکاروں نے موثر انداز میں دہشت گردوں کو جواب دیا جس کے نتیجے میں دو دہشت گرد مارے گئے جن کی شناخت آفتاب عرف ملنگ اور مسعود شاہ کے نام سے ہوئی ہے۔

ہلاک دہشت گرد سیکیورٹی فورسز کے خلاف دہشت گردی کی متعدد کارروائیوں سمیت بے گناہ شہریوں کی ٹارگٹ کلنگ میں ملوث تھے۔

ان کے قبضے سے اسلحہ، گولہ بارود اور دھماکہ خیز مواد بھی برآمد کیا گیا ہے۔

فائرنگ کے تبادلے کے دوران آزاد کشمیر کے ضلع بھمبر کے 29 سالہ سپاہی محمد افضل اور مانسہرہ کے 27 سالہ سپاہی ابرار حسین بہادری سے لڑتے ہوئے شہید ہو گئے۔

علاقے میں موجود ممکنہ دہشت گردوں کے خاتمے کیلئے سینیٹائزیشن آپریشن بھی کیا گیا۔

آئی ایس پی آر کے مطابق سیکیورٹی فورسز ملک سے دہشت گردی کی لعنت کو ختم کرنے کے لئے پرعزم ہیں اور بہادر جوانوں کی قربانیاں دہشت گردی کے خلاف عزم کو مزید مضبوط کرتی ہیں۔