پاکستان اور ترکیہ کے درمیان 18 ویں پاک ترکیہ اعلیٰ سطح ملٹری ڈائیلاگ گروپ کا چار روزہ اجلاس اختتام پزیر ہوگیا ہے۔

وزارت دفاع کی جانب سے جاری کردہ اعلامیے کے مطابق پاک ترکیہ ملٹری ڈائیلاگ گروپ کا اجلاس 13 سے 16 فروری تک وزارت دفاع راولپنڈی میں منعقد ہوا۔

ملٹری ڈائیلاگ میں پاکستانی وفد کی قیادت سیکرٹری دفاع، لیفٹیننٹ جنرل (ریٹائرڈ) حمود الزماں خان  جب کہ ترکیہ کے وفد کی سربراہی ترکیہ کے ڈپٹی چیف آف جنرل اسٹاف عرفان اوزسرٹ نے کی۔

ترکیہ کے چیف آف جنرل اسٹاف اور سیکرٹری دفاع لیفٹیننٹ جنرل (ریٹائرڈ) حمودالزمان خان کے درمیان ملاقات بھی ہوئی۔

ملاقات میں دونوں جانب سے دفاعی تعاون کی رفتار پر اطمینان کا اظہار کیا گیا اور اسے نئی بلندیوں تک لے جانے کا عہد کیا گیا جب کہ سلامتی، انسداد دہشت گردی اور موجودہ علاقائی اور جغرافیائی و سیاسی امور بھی زیر بحث آئے۔

وفود کی سطح پر مذاکرات میں گزشتہ سال ترکیہ میں ہونے والے اجلاس کے انعقاد کے بعد سے اب تک ہونے والی پیش رفت کا جائزہ لیا گیا جب کہ تربیتی مشقوں، دوروں کے تبادلے اور دفاعی ساز و سامان کی مشترکہ پیداوار سے متعلق دفاعی تعاون سے متعلق امور پر تبادلہ خیال کیا گیا۔

وفد نے دفاع اور سلامتی کے شعبوں میں تعاون بڑھانے کے لیے مل کر کام کرنے کا عزم کیا، اس بات پر بھی اتفاق کیا گیا کہ پاکستان ترکیہ مذاکرات کا 19 واں دور 2025ء میں باہمی طور پر طے شدہ تاریخوں پر ترکی میں منعقد ہوگا۔