ریلوے ملازمین کی انتھک محنت سے آمدن 60 ارب تک پہنچ گئی جس کے سبب تنخواہوں کی ادائیگی میں تاخیر بھی ختم کر دی گئی۔

کئی ماہ سے تنخواہوں کی ادائیگی تین ہفتے تک تاخیر کا شکار تھی تاہم پاکستان ریلویز نے رواں ماہ ملنے والی تنخواہوں کی مکمل ادائیگی کر دی ہے۔

اپنے بیان میں سی ای او ریلوے عامر بلوچ کا کہنا تھا کہ مشکل وقت میں ساتھ دینے پر اپنے ورکرز کا شکر گزار ہوں، اب ملازمین کی تنخواہیں بر وقت ملا کریں گی۔

انہوں نے کہا کہ ریلوے اپنے ملازمین کو پانچ مراحل میں تنخواہیں ادا کرتا ہے، تنخواہیں ہر ماہ کی یکم، پانچ، دس، پندرہ اور پچیس تاریخ کو ادا کی جاتی ہیں، تنخواہوں کے چیک اب انہی تاریخوں میں بنک جایا کریں گے۔

سی ای او ریلوے عامر بلوچ کا مزید کہنا تھا کہ عید تک ٹرینوں میں بکنگ بھی 100 فیصد ہوگئی، مسافروں کی سہولت کے لیے عید پر چار اسپیشل ٹرینیں چلا رہے ہیں، مسافروں کا ریلوے پر اعتماد ہمارے لیے باعث فخر ہے۔