آئی ایس پی آرکے مطابق ڈیرہ اسماعیل خان میں خودکش حملے کے دوران دو سیکیورٹی اہلکار شہید ہو گئے۔

پاک فوج کے شعبہ برائے تعلقات عامہ آئی ایس پی آر کے مطابق خودکش حملہ آور نے سیکیورٹی فورسز کے قافلے کو نشانہ بنایا جس کے نتیجے میں دھرتی کے 2 بہادرسپوت شہید ہوگئے۔

آئی ایس پی آر کے مطابق شہدا میں نائب صوبیدار یاسر شکیل اور سپاہی ظاہر نوید شامل تھے۔ 38 سالہ نائب صوبیدار یاسر شکیل اور 34 سالہ شہید سپاہی طاہرنوید کا تعلق کوہاٹ سے تھا۔

آئی ایس پی آرکا کہنا ہے کہ پاکستان کی سیکیورٹی فورسز دہشت گردی کی لعنت کو ختم کرنے کے لیے پرعزم ہیں۔ ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔ پاکستان کی مسلح افواج قوم کے شانہ بشانہ کھڑی ہے۔ دہشتگردوں کی امن و استحکام کو سبوتاژ کرنے کی تمام کوششوں کو ناکام بنانے کے لیے پرعزم ہیں۔

آئی ایس پی آر کے مطابق ہمارے بہادر بیٹوں کی یہ قربانیاں دہشت گردی کی لعنت کے خلاف لڑنے کے ہمارے عزم کو مضبوط کرتی ہیں۔ مادر وطن سے دہشت گردی کی لعنت کے خاتمے تک دہشت گردی کے خلاف جنگ جاری رہے گی۔ مزید اس بزدلانہ حملے کے ذمہ داروں کو انصاف کے کٹہرے میں لایا جائے گا۔