غزہ میں عیدالفطر پر بھی اسرائیلی وحشت  اور بربریت جاری ہے، تازہ حملوں میں حماس کے سربراہ اسماعیل ہنیہ کے تین بیٹوں اور پوتوں سمیت مزید 125 فلسطینی شہید ہوگئے۔

بین الاقوامی خبررساں ادارے کے مطابق مقبوضہ فلسطینی علاقے غزہ میں فضائی حملے میں حماس کے سربراہ اسماعیل ہنیہ کے 3 بیٹے اور 3 پوتے شہید  ہوگئے۔

گزشتہ 24 گھنٹوں کے دوران  اسرائیلی بمباری میں  کم از کم 125 فلسطینی شہید  اور درجنوں افراد زخمی بھی ہوئے ہیں۔

عرب میڈیا کے مطابق اسرائیلی طیاروں نے شمال مغربی غزہ میں شاتی مہاجر کیمپ کو نشانہ بنایا۔

ایک عرب ٹی وی کو انٹرویو میں اسماعیل ہنیہ نے تصدیق کی کہ اسرائیلی حملے میں ان کے بیٹے ہازم، عامر اور محمد شہید ہوگئے جبکہ ان کے پوتے بھی شہید ہوئے۔

صیہونی فورسز نے غزہ کے شجاعیہ، صابرہ، تل الحوا اور شیخ عجلین کے محلوں پر شدید گولہ باری بھی کی۔

واضح رہے کہ  غزہ میں شہداء کی مجموعی تعداد 33 ہزار  سے تجاوز کر گئی  ہے جبکہ 75 ہزار  سے زائد افراد زخمی ہو چکے ہیں۔