ایف آئی اے امیگریشن حکام نے ایئرپورٹ پر کارروائی کرتے ہوئے لاکھوں مالیت کے موبائل فونز اور لیپ ٹاپ برآمد کر لیے۔

تفصیلات کے مطاقب ایف آئی اے امیگریشن حکام نے اسلام آباد ائرپورٹ پر بڑی کارروائی کرتے ہوئے 70 لاکھ سے زائد مالیت کے موبائل فونز اور لیپ ٹاپ برآمد کر لیے۔

بیرون ملک سے آنے والے مسافروں سے بڑی تعداد میں قیمتی موبائل فون، لیپ ٹاپ اور الیکٹرونک ڈیوائسز برآمد ہوئیں۔

ملزمان فلائٹ نمبر ای ڈی 211 کے ذریعے دبئی سے پاکستان پہنچے تھے، ملزمان نے خفیہ خانوں میں موبائل فونز چھپائے ہوئے تھے۔

ملزمان میں محمد سلمان اور محمد عابد شامل ہیں، دونوں ملزمان کا تعلق کراچی سے ہے۔

ملزمان کے قبضے سے 5 آئی فون 15 پرومیکس، 3 آئی فون 13 اور 3 سامسنگ گلیکسی ایس 24 برآمد ہوئے جبکہ 8 عدد لیپ ٹاپ بھی برآمد ہوئے۔

برآمد کئے گئے سامان کی کل مالیت 70 لاکھ روپے سے زائد بنتی ہے۔

ملزمان دوران امیگریشن پوچھے گئے سوالات پر حکام کو مطمئن نہ کر سکے اور بار بار ٹریول کرنے پر ملزمان کے سامان کی چیکنگ کی گئی۔

ترجمان ایف آئی اے کے مطابق ملزمان کو مزید قانونی کاروائی کے لئے کسٹم حکام کے حوالے کر دیا گیا ہے۔