ورلڈ بلائنڈ کرکٹ کانسل نے چوتھا بلائنڈ کرکٹ ورلڈکپ پاکستان کو الاٹ کردیا۔

ورلڈ بلائنڈ کرکٹ کانسل نے چوتھا بلائنڈ کرکٹ ورلڈکپ پاکستان کو الاٹ کردیا ہے جب کہ میگا ایونٹ رواں برس 22 نومبر سے 3 دسمبر تک منعقد ہوگا۔

ٹورنامنٹ کے انعقاد کے لئے پاکستان بلائنڈ کرکٹ کونسل نے سندھ اور پنجاب کے وزراء اعلیٰ کو خط لکھ دیا ہے۔

چیئرمین بلائنڈ کرکٹ کونسل سلطان شاہ نے کہا کہ وزیر اعلیٰ سندھ مراد علی شاہ نے کراچی میں ٹورنامنٹ کروانے کی حامی بھردی ہے۔

خیال رہے کہ بلائنڈ کرکٹ ورلڈکپ میں مجموعی طور پر 8 ٹیمیں حصہ لیں گی، ایونٹ میں میزبان پاکستان، بھارت، جنوبی افریقہ، نیپال، بنگلا دیش، سری لنکا، ویسٹ انڈیز اور نیوزی لینڈ کی ٹیمیں شرکت کریں گی۔

سلطان شاہ کا کہنا ہے کہ بھارت نے سب سے پہلے ایونٹ میں شرکت کی یقین دہانی کروادی ہے، بھارت کی ٹیم پہلے بھی پاکستان آچکی ہے اور ان کو اپنی حکومت کی اجازت کی ضرورت نہیں۔

چیئرمین بلائنڈ کرکٹ کونسل نے کہا کہ چیمپئنز ٹرافی سے قبل بلائنڈ کرکٹ ورلڈکپ کا انعقاد خوش آئند ہوگا، چیمپئنز ٹرافی سے قبل بھارتی بلائنڈ کرکٹ ٹیم کی پاکستان آمد سے دنیا میں مثبت پیغام جائے گا۔